30buba C5 tetoktepba nung A&B Fellowship-i takok angu

Mokokchung, Luchii/Dec. 19 (TYO): Mongolbar nikongdang MTBA Mother Church, Mokokchung nung C5 ta ajaba Children’s Christmas Cake Carol Competition agiogo, aser iba tetokepba nung Mokokchung Town Baptist Church Youth Department kübok Fellowship balala nungi tanur 721-i shilem agia liasü.
Tsüngsang-mopung majungba ajanga jila tiyong nung ayongba sentong raksatsütsü südi ta bilema liasü, ajisüaka nisung aika adenshia Fellowship 9 nungi arishi küm 4-12 tsüngdapur tanurtemi shilem junga agiba kulisüa reprangogo.
30buba C5 Ultimate Championship title ji A&B Fellowship (tanur 72)-i angu, iba sülen tanabuba aser tasembuba jenjang nung takok angurtemji Medical Fellowship aser Salangtem Fellowship na liasü.
Taküm C5 Champion-i December 23 nü MTBA temoatsü sentep sentong nung shilem agitsü aser tanabuba jenjang nung takok anguri December 24 nü Mokokchung Christmas Cake Race sentong nung shilem agitsü.
United Christian Fellowship nungi tanurtem aser Maharashtra nungi tang mission ka atema Mokokchung jila semdanga alir Youth With a Mission (YWAM) züngsemtemia C5 sentong nung shilem agia liasü.