Tetsür team coach mapa atema Kirsten, Gibbs, Powar nunger tendangtsü

Luchii/December 19, 2018 (Agencies): India women cricket team coach shimshiba maparen tanabuba jenjang Yangtepnü akatsü. Coach menden asoshi tetokteper rongnung Gary Kirsten, Herschelle Gibbs aser Ramesh Powar nunger densema lir aser parnok BCCI selection panel-i asadangtsü. Applicants 28 rongnungi shimtetba rongnung ano W V Raman, Venkatesh Prasad, Manoj Prabhakar, Trent Johnston, Mark Coles, Dimitri Mascarenhas aser Brad Hogg nunger densema lir.
Coach tasenba atema teshimtetba purtem ya ad-hoc panel kati asadangtsü kong taoba India nunger cricket asayar Kapil Dev, Anshuman Gaekwad aser Shantha Rangaswamy nunger densema lir. Osang ajanga angazükba agi, Bendangertem timba kati Skype ajanga dang parnok indang presentation agütsütsü aser kasa mapang nung India nunger Powar nungerbo tsüngtong arua shilem agitsü.
“ad-hoc panel nung taoba mapang nüngtugu asayartem densema lir. Iba committee yagi coach tajungtiba ka shimtsü ta ni temulung lema bilemer,” ta BCCI ketdangser kati PTI dang ashi. Supreme Court-i shimba Committee of Administrators (COA) nung Vinod Rai (mendenbuba) aser taoba India captain Diana Edulji densema lir aser coach shimba inyakyim nung telemsa adoker lir.
Edulji-i taruba ita New Zealand tour tashibo Powar nem iba mapa bendaktsüner aser kasa mapang nung Rai-i BCCI dang coach tasen ka shimtsü asoshi application tem agizüktsü atema tetuyuba agütsü. ODI captain aser asayar Mithali Raj Powar den asayar shimba dak sendakba nung mangatettep adokba sülen Powar mapa nungi Yimpoksüi/Nov 30 nü anen.
Board-i tang coach tasen shimtsü atema interview agitsü telemtetba agiogo. T20 captain Harmanpreet Kaur aser Smriti Mandhana nati Powar pusema nokdakba sülen pai iba mapa asoshi tanaben apply asütsü telemtetba agi. Powar aser Harmanpreet den team management nung tanga züngsemtemi World T20 semifinal asaya nung Raj manioktsü asoshi telemtetba agi, koba England team-i parnok wicket 8 agi akok.
West Indies nungi India-i meyipa aruba sülen Raj-i, la career raksatsütsü merangba aser la bendanga amshiba atema Powar aser Edulji na aitsü. Kasa mapang nung Powar-i raj aija, la nem opener asütsü aoshi maongka magütsüba sülen lai World T20 asayamung tom nung team toktsü aotsü amokmerena liasü, ta ashi.