Nagaland nung army ketdangser 2-i süpokrem agiba atema CBI-i tai tongloktsü

New Delhi, Luchii (December) 19 (Agencies): Nagaland nung mapa lemzükja aliba sepaitem indang ration atema supplier ka dang nungi sen lakh 82 dak tema süpokrem meshia agiba atema CBI-i lieutenant colonel jenjang nung Army ketdangser 2 dak tai tongloktsüogo.
Army Service Corps nung ketdangsertem- Lt Col Amit Sharma aser Lt Col Sutikshan Rana nati 2012 aser 2016 tsüngda Dimapur, Nagaland nung ration supplier ka dang nungi sen lakh 82 dak jungnüa süpokrem meshia agi.
Army 3 Corps indang headquarters nung mapa lemzüka aliba Brigadier Rajiv Gautam-i ken o benokba nung ajemdaker CBI-i iba mapa inyaker.
July 27, 2012 nungi October 15, 2014 tashi Sharma ya Dimapur nung Army Service Corps (Supply) Type ‘C’ indang commanding officer liasü. Külen, Rana-i October 16, 2014 nungi September 10, 2016 tashi kasa mapaji inyak.
Iba ken o atema Army-i ‘court of inquiry’ ka asüdang contractor Jai Prakash Singh ket nungi ketdangser ana jagi sen lakh 82 tashi agütsüba putet, ta FIR nung shia lir.
CBI-i mezüng tai tongloktsüba onüktem atema bushisüngdang asü. Lt Col Sharma nem sen lakh 58.62 aser Lt Col Rana nem sen lakh 25.21 agütsüba maparen CBI-i bushisüngdang. Ajisüaka, Singh-i Sharma nem sen lakh 10 aser Rana nem sen lakh 3.40 agütsüba kulitem ano mengutet lir, ta FIR nung shia lir.