NBA Pre-season asaya ana Mumbai nung asayatsü

Mumbai, Luchii/December 20 (Agencies): National Basketball Association (NBA)-i Yangtepnü, Indiana Pacers aser Sacramento Kings na Mumbai nung 2019 Mongputeni/Oct nung pre-season game ana asayatsü sangdongogo. NBA team ana tang India nung asayatsü aliba ya US nung amendaker aliba nüngtugu league nungi team tem India nung mezüngbuba asaya asütsü.
NBA India Games 2019 ya Mongputeni/Oct 4 aser 5 nü NSCI Dome, Worli nung asayatsü, ta NBA Deputy Commissioner Mark Tatum aser NBA India Managing Director Yannick Colaco nati Mumbai nung metetdakja liasü.
Asaya den külemi league aser parnok den longjemer inyakertemi interactive fan activities, Jr NBA youth basketball programming aser NBA Cares community outreach sentong ayonga akatsü.
Kings kiburtem rongnung Mumbai nung soa intetsang Vivek Ranadive shilem tuluba lir aser parnok rongnung Marvin Bagley III, De’Aaron Fox aser Buddy Hield (Bahamas) nunger densema lir.
Kasa mapang nung Pacers pur rongnung Victor Oladipo, Myles Turner aser Domantas Sabonis (Lithuania) nunger densema lir.
“NBA India Games mezüngbuba ajanga linük nung saisapong renloka aoba aser lanurtemi kanga jangrabangra shilem agiba den basketball asaya renloka aotsü lenmang sadema lapoka aliba maneni ajungmesotsü.
“Onoki Kings aser Pacers organizations dang iba otsüsütsü asaya nung shilem agitsü mulungtetba atema kanga pelar,” ta NBA Commissioner Adam Silver-i ashi.
“Alima nung sports league tem rongnungi onok mezüngbuba India nung asayatsü asoshi kanga nemadanga bilemer. NBA aser basketball ya India nung tanga mapang dang nungi tang kanga nüngtuguba lir aser Sacramento Kings aser Indiana Pacers na asaya ajanga temaba jenjang nung asaya fan temi kanga jangratema reprangtsü,” ta Colaco-i ashi.
Ranadive-i, par team India nung asayatsü yongyaa atar, ta ashi.
“Sacramento Kings pur India nung mezüngbuba NBA asaya nung shilem agitsü nemadanga bilemer. Indian-American ka ama ni soa ainba linüki otsüsütsü maparen ka bener aruba nung teyari agütsütsü jangratema bilemer,” ta Ranadive-i ashi.