Khristanpur puang, mesüra mapa nungi anentsütsü

Beijing, Luchii/Dec. 21 (Agencies): China nung ketdangsertemi Khristanpur aputsü asoshi quota yanglur aser parnoki züngzükja aliba ama mepura mapa nungi anentsütsü amokmerener, ta iba linük nung tamangba yimsü temeden asadangba telok kati züluba magazine nung shia lir.
Bitter Winter magazine ajanga ashiba agi, Liaoning indang Dalian yimti nung National Security Bureau-i iba totuyuba ya agütsü aser iba ya “100-point evaluation system” nung ajemdaker lir. Bitter Winter ajanga iba yimti nung police tanishir ka den sensaksem aka.
“Küm ka nung pezüben asadang dang nunglokja aliba ama meinyakteti lira police station nung tekolakba mapa nungi anentsür,” ta Bitter Winter ajanga ashi.
“Iba quota nung shia aliba ama inyaktsü asoshi police station temi taoba mapang pua alir tamangertem indang tenüngtem ya ki kiburtem aser item tesemtem nung alirtem nem agütsür aser temulung malemtsüsa mapa inyakba metetra police nem osang agüjang ta ashir,” ta iba magazine nung zülua lir.
Tamangba yimsü ajunga nung tenük yoker.
Arogo nung lennir ka apuba ya points 100 nungi points 10 alang lir, ta Bitter Winter ajanga ashi. Police station kati tanga police station dang taoba mapang Khristanpur apuba list ya alir.
“Tamanger shirnokisa tamangba yimsü dak sendakba kaket asem dak tali pena alir, parnok ji pua asüngdangyatsü asoshi National Security Brigade dangi yoktsüla, ta police ketdangser nem totuyuba agüja lir,” ta Bitter Winter nungsa shia lir.
Police ketdangseri tai maket Khristanpur mepuner saka pai item Khristanpur mepura timtem ajurutsü tsübur, ta Bitter Winter dang ashi.
China nung Khristanpur anema tali tesashiba nung nokdakba mapang iba osang ya arur. Register masüba aser China nunger ozüng tasenba (tamangba yimsü melenba aser online nung Khristanpur indang post asüba nokdangba) sülen manidakba mechi Luchii/December 10 nü China nung nisung aikati meteta aliba pastor tejangja ka dena Khristanpur 100 dak tali apu.
Sichuan province nung Early Rain Covenant Church ya register süa mali aser iba arogo nung züngsemtem ya apu, ta Open Doors ajanga ashi.
Ozüng alema house church aika miimshia tenzüka liaka Early Rain yabo tema nung tekülem sentong agir. Iba arogo nung pastor, Wang Yi-i ketdangsertemi ashiba mapang pai sayutsüngiba ya online nung post sütsü aser yimtong nung sayutsüngia jaja.