Manipur journalist-i NSA anema HC nung ken o benok ; India nung media telok balalai pa chioktsü akhanger

Imphal, Luchii (December) 21 (Agencies): BJP aser Prime Minister Narendra Modi dak tai tongloktsüba atema aija apuba Manipur journalist Kishorechandra Wangkhem-i Manipur High Court nung pa National Security Act (NSA) kübok tepuokdak ayuba anema petition ka benokogo.
Kishorchandra atema lawyer Ch. Victor-isa okadak dang ‘detention order, approval order aser confirmation order’ ajak agientsü atema mepishi.
“State indang security anema aser tensa majungtsüsa” ta asüba kuli ka danga mali, ta paisa okadak ashi.
“Pa apuba kulitem tejangja mali. Parnok aitsüba onüktemji freedom of speech aser expression dak dang sendaktepa lir” ta Victor-isa shisem.
Manipur nüjiso bushiba maparen den Rani of Jhansi sendaktepba jembiba atema Kishochandra-i chief minister, N. Biren dak tai tongloktsü. Iba onük atema pa November 20 nü apu.
Ajisüaka, November 26 nü chief judicial magistrate-i pa chiok.
“Tai tonglokja alisangi video nung jembiba olentemji linük anema ta züngshitsü makok. Iba ya public lennir kati yimdong kazür ka ama jembiba anema tebilemba lemsatepba dang lir” ta CJM-ibo ashi.
Saka iba tasüngji police-i Kishochandra apu aser NSA kübok tai tongloktsü. Pa apuba sülen anogo pezü lir district magistrate Imphal West district-i Kishorchandra kinungtsü nem NSA kübok pa dak tai tongloktsü osang metetdaktsü.
December 14 nü Manipur state sorkari NSA kübok Kishorchandra Wangkhem tepuokdak ayutsü mulunga agizük aser pa küm ka ayutsü mapang latettsü.
Linük nung media nisungtem aser teloktemi Kishorechand Wangkhem posema nungiter aser pa chioktsü atema akhanger.
Indian Women’s Press Corps, Press Club of India, Press Association aser Federation of Press Clubs in India teloktemi külem sangdong ka nung, National Security Act kübok Kishorechand Wangkhem ita 12 tepuokdak ayutsü temerenshi agütsübaji onoki süoki ia bilemer, ta metetdaktsü.
“Temeten agütsütsü atema Kishorechand Wangkhem aitsüba ozüng tesashiji agientsüla aser freedom of speech & expression temeten agütsütsüla” ta parnokisa ashi.