Japan Cabinet-i sen billion $900 budget agizükogo

Tokyo, Luchii/Dec. 21 (Agencies): Taruba fiscal year atema Japan Ato Kilonser Shinzo Abe’er cabinet ajanga Rogonü sen billion $900 draft budget agizükogo, kong yokyayokchi saru timba kümdaktsüba ajanga nüburtem jashitepa aliba atema anisüngzük agütsütsü.
Rongchii/April 1 nungi tenzüka taruba küm atema general-account budget ya yen trillion 101.5 (USD billion 902.3) lir aser iba budget nung nüburtem nem lenmang balala nungi teyari agütsüba, public works aser defence nung sen tali indoktsü, ta Ministry of Finance ajanga Rogonü metetdaktsü.
Taküm küm tetenzüklen sen indoktsü benokba ya sen yen trillion 97.7 liasü aser tang tasenba budget ya küm tenet tashi atonga otsü tasen yanglur lir, kong nütsüng tajemba akümba mapang nüburtem nem teyari agütsüba tsütsü tim atemba nungi anitettsü meranger.
Rongchii/April nung parliament ajangtsü aliba budget ajanga Abe-i taoba mapang rongsenketsüng nung timtem ajangshiba ama tanaben majangshitsü asoshi sen aika indoktsü mulunga aliba sayur. 2014 küm Rongchii/April nung yokyayokchiba saru shilem 5 nungi 8 akümba ajanga Japan rongsenketsüng tsütsü timtem ajurua liasü.
Abe-i iba saru shikem 10 kümdaktsütsü anaben tashi thinena lir. Saka pai Mongputeni/October 2019 nungbo iba mera ya agitsü südi.
Sen yen trillion 101.5 indang budget nungi sen yen trillion 2 shi yokyayokchi saru timba akümba ajanga temelenshi aruba mapang amshitsü lir, kong kiojen yangluba nung indokba nungi sen kanga ajema anuba kibongtem yaritsü asoshi shopping voucher densema lir.
Taruba fiscal nung sorkari saru nungi sen yen trillion 62.5 shi sarutettsü imlar.