Manipur aser Nagaland tsüngda arrtsü angatetteptsü: N. Biren Singh

Imphal, Luchii (December) 21 (Agencies): Manipur aser Nagaland arrtsü anasa aliba Dzukou Valley aser Tungjoy village atema mangatettep ken o tem angatetteptsü ta Manipur Chief Minister N. Biren-i tanü ashi.
Taoba ita Nagaland nung Manipuri trekkers 8 apuba dak sendakba atema Congress MLA K. Meghachandra-i assembly nung asüngdangba ka langzüdang Biren Singh-i state ana tsüngda arrtsü mangatettep angatetteptsü ta langzü.
State anaprong nungi teshimtet nübotemi sign asüba tenangzüktepba nung Dzukou Valley ya Nagaland meyong ta shia mali. Dzukou Valley asemsü nungi anasüji Manipur litsü nung aser shilem kaji Nagaland nung lir, ta Manipur chief minister-isa shisem.
Manipur kübok Senapati district nung Mao nungi Dzukou Valley tashi lenmang yanglutsü. Iba denji külemi tourist lodge ka yanglutsü, ta paisa metetdaktsü.
Nagaland-ia par tsütsü teinyaktsü mapatem inyakogo.
Sangai festival mapang Manipur nungi trekker 15 Dzukou Valley-i ao. Iba mapang morok meyi ka ajanga par 8 Nagaland telungi ai. Idangji police-i parnok apu.
Nagaland nung Inner Line permit ya Manipuri nunger danga meshir aser iba atema Manipur nung alir aikati mepelar.
Manipur nungi trekker temi agreement ka nung sign asüba sülen ang meyipa yok.
Manipur aser Nagaland tsüngda arrtsü indang mangatettep adokbaji tang mezüng masü. Taoba mapang nunga arrtsü mangatetteptem adokogo aser tang tashi itemji mangatettep lir.