Jalukie nung Forest View point ka semzükogo

Peren, Luchii/December 21 (TYO): Peren Forest Division kübok Jalukie nung Luchii/December 20, 2018 nü M. Mhonbemo Ngullie, IFS Additional Principal Chief Conservator of Forest, Nagaland-i Forest View point Jalukie tajungba küma tepor junga yanglushiba semzüktsüogo.
Iba mitsa ya jila nung kanga tongtibang tesem ka nung amenoka lir, kong nüburtemi alima tepor ajungba penzüba ajanga tepela angutsü aser südoksünema kazütsü atema tesem tetemjen ka asütsü.
Iba sentong nung jembidang APCCF, Mhonbemo-i, Peren District ya Tsüngremi tepor junga moatsüba aser ali rongsen adokdak tesem rongnung ka lir ta ashi. Paisa, tesendaktep tajung ali nungdang Forest Dept aintsü aser nübur tajungtiba agi tenzüktettsü, ta ashi.
Kasa sentong nung Divisional Forest Officer, Peren, Dr. Sentitula, IFS-i sentong nung adener ajak dang pelaba metetdaktsü aser iba maparen nungittsü asoshi mepishia liasü, aji asünungang Forest View point ama tesem ya nüburtem atema temoatsü ka asutsü, ta metetdaktsü.
Iba sentong nung ward chairman tem, Arogo balala nungi pastor tem aser Women Welfare organisation den Youth Wing Organisation nungi züngsemtem dena liasü. Local Baptist church, Jalukie, Pastor, Mpom-i iba View point meshiteta sarasademtsü aser sentong tembanga Irai Ranger-i sarasadema liasü.