Governor aser TR Zeliang nati benjung salem abener

Dimapur, Luchii (December) 21 (TYO): “Christmas ya tesüiba bilemteta aser tarutsü atema teimla yur pelatepba mapang ka lir. Iba mapang kinungertem aser medemertem den benjungteper aser Yisu Khrista asoba benjung amungdang ni aser kü kinungtsü Kavita Acharya natia Nagaland nung alirtem den tepela salem lemsateper” ta Governor P.B Acharya-i ashi.
Benjung mongpu tajungtiba mapang temeim agi asen mulungjang aser ki süngdaktsüdi. Nagaland nung Yimjung Chuba Jabaso alitsü aser yimsü asütsü atema asenoki Khristan tesayubatem nung ammetdi, ta paisa ashi.
Nagaland renlokdaktsütsü, rongsenkettsüng jenjang tajungba kümdaktsütsü aser azükarutsü atema asenoki Küm Tasen 2019-i ayaoka aidang nisung shia aser kibong shia tajungba melenshidi. Maneni, asen yimten tebilemtsü latettsü atema aser teti atema yimjung alitsü atema asenoki sarasademdi, ta Acharya-isa ayongzük.
Maneni, kübotsü künati Nagaland nung alir ajak dangi Tepela Khristmas aser Küm Tasen salem metetdaktsür, ta paisa shisem.
Nagaland nung taoba Chief Minister aser opposition lennir T.R Zeliang-ia Khristmas salem metetdaktsü.
Khristmas ajanga Tsüngremi asenok meimba bilemtetdaktsür. Asenoki Yisu Khrista asoba benjung amungtsü renemdang, ni Nagaland nung alir ajak dangi temoatsü aser tetezü aketba Khristmas ka amungtsü salem metetdaktsür, ta paisa shisem.