Ganga ayong tesem 39 nungi tesem ka dang merükteta lir: CPCB

New Delhi, Luchii/December 22 (Agencies): Taküm tzüngluruwa sülen Ganga ayong nung tesem 39 nungi tesem ka nung dang tzü merüka liasü, ta tanü Central Pollution Control Board (CPCB)-i metetdaktsü.
Taküm tzüngluruwa mongpu matongdang Ganga ayong nung tesem 41 nungi tesem 37 nung tzü kanga menena liasü, ta CPCB indang ‘Biological Water Quality Assessment of the River Ganga (2017-18)’ report ajanga metetdaktsü.
Supreme Court tetuyuba nung ajemdaker CPCB-i study agia iba osang metetdaktsü.
Tzüngluruwa mongpu matongdang ayong tesem 41 nungi tesem 4 nung ang tzü merüka mesüra tera menena liasü aser tzüngluruwa mongpu sülenbo tesem 39 nungi tesem ka nung dang tzü merüka liasü, ta parnoki metetdaktsü.
Kasa osang ajanga ashiba agi, tzüngluruwa mongpu matongdang aser tzüngluruwa mongpu süiba sülen tesem balala nungi tzü samples agiteta tendang liasü aser tzü quality telemsa pongu küma lemsa- (A) temerük, (B) tera menener, (C) teyari ka menener, (D) kanga menener aser (D) kanga mejungi menener.
Kasa osang ajanga, Uttar Pradesh state kübok Ganga ayong nung yimokba tongti ayong ana- Pandu aser Varuna ayong na ajanga Ganga ayongtzü ano taliba menentsür, ta metetdaktsü.