Sorkari TV densema osettsüset 23 nung GST saru shilem ajemer

New Delhi, Luchii/December 22 (Agencies): Nüburtem anisüngzüktsüsa tanü GST Council-i TV screens, movie tickets aser power banks densema osettsüset 23 nung GST saru shilem ajemogo.
Osettsüset 23 nung saru shilem ajemba ajanga kümshia sorkari sen crore 5,500 takoksa angutsü, ta Union Finance Minister, Arun Jaitley-i metetdaktsü.
GST council-i saru shilem 28 agia aliba oset tenet nung saru shilem ajem, anungji saru shilem 28 agiba oset 28 dang anünger.
Tanü New Delhi nung 31buba GST Council senden amenba sülen osangbenertem den jembidang Jaitley-i, rate reprangshiba ya tanen makai inyakba maparen ka lir, ta metetdaktsü.
“Saru shilem 28 agiba ya ajema kümdar,” ta paisa ashi.
Joko tangbo gari parts aser cement densema luxury osettsüset nung ang saru shilem 28 agitsü, ta paisa metetdaktsü.
Sen 100 jenjang movie tickets nung saru shilem 18 agia aliba nungi shilem 12 dang kümtsüogo, aser sen 100 dak tema tickets nunga shilem 28 agia aliba nungi shilem 18 dang kümtsüogo. Iba ya ajanga saru nung sen crore 900 takoksa angutsü, ta Union Minister-i metetdaktsü.
Inch 31 indang monitors aser TV screens den power banks nung saru shilem 28 agia aliba nungi shilem 18 dang kümogo.
Saru shilem tasenbaji sangküm January mezüngnü (January 1, 2019) nungi mapa küma benshitsü.