Mahabharata film nung Aamir Khan-i shilem aginer

Luchii/December 22, 2018 (Agencies): Diwali mapang sayaba Thugs of Hindostan box office nung takok tajung manguba ajanga actor Aamir Khan tezüdang aludaktsüogo ajisüaka pa tesüiba lepa meprangi tejakleni aotsü merangdar, kechiyong pa Mahabharata film nung shilem agitsü asoshi tang inyaksangshidar.
Pai Mahabharata nung shilem agitsüba indang mapang talangka nungi jembia aruogo, aser tang Shah Rukh Khan-i ashiba agi, Aamir-i iba film nung shilem agitsü asoshi asadangdar. DNA den sensaksemdang pai kechi shilem aginür ta asüngdangba mapang Shah Rukh-i, Mahabharata nungi Krishna shilem aginer ta ashi, ajisüaka iba shilem ya Aamir-i mekazükogo anungji ni magitettsü, ta shisem.
Osang ajanga ashiba agi, Mahabharata ya sen crore 1000 indoka yanglutsü saka web series ama shilem tenet küma lemsar yanglutsü. Taoba mapang nung Aamir-i astronaut Rakesh Sharma indang taküm otsü film nung shilem agitsü liasü saka pa tanga mapa ka nung shilem agitsü atema Shah Rukh nem iba shilem agütsü. Otsü zülur Anjum Rajabali-ia iba osang jangjatsüogo. “Aamir den iba film yanglunüa liasü. Pai script kanga saklok aser küna aiben sensaksemogo, saka Aamir-i Mahabharat project nung kanga temulung agüja inyakdar,” ta Anjum-i ashi.
Aamir asoshi iba küm ya tanga mapang ama takok tajung anguba küm ka masü kechityong Thugs of Hindostan film, kong Amitabh Bachchan, Katrina Kaif aser Fatima Sana Shaikh nungeria tongi shilem agir, iba film ajanga nüburtem atsüa marutet. Aamir-i iba film ajanga movie reprangi aoertem jangramedemdaktsüba asoshiparnok dang tatok meshia liasü.