Liverpool-i Wolverhampton koka temaba jenjang nung lir

Luchii/December 22, 2018 (Agecnies): Rogonü Wanderers pur 2-0 agi akokba sülen Christmas matong tsüngda Liverpool pur Premier League nung temaba jenjang tongtetogo.
Asaya nung mezüngbuba goal ya minute 18buba nung Fabinho-i cross asüba ball ka Salah-i idakja liasü, aser pai tang tashi nung goal 11 idakja EPL nung nung goal timtiba idaktsüsang kümogo.
Kasa mapang nung tanabuba goal-a Salah-i teyari agüja Van Dijk-i idakja liasü.
Liverpool pur iba season nung asaya 18 tashi khen dang tamakok mongui asayaa arudar aser Christmas matong tsüngda Manchester City puri parnok majatettsü. Tanabuba jenjang nung aliba City pur Liverpool dang nungi point 4 agi tajemba lir.
“Onoki kanga junga asayaogo aser talisa tzünglu agi meinpronga asaya mejungi akümba aonungka onoki kanga junga asayatetogo. Onok Manchester City pur den asayatsü lir koba kanga melarabo masütsü,” ta Liverpool manager Juergen Klopp-i ashi.
Asaya 11 tashi nung Liverpool pur goal ka danga mechi asayaa arudar.
Kasa mapang nung Salah-i Arsenal striker Pierre-Emerick Aubameyang ajateta goal timtiba agütsürtem rongnung temaba jenjang tongtetogo, ajisüaka taoba küm dang nungi pai taküm goal ishiba agüja lir. Taoba küm pai iba mapang nungbo goal 14 agütsür liasü.