Tata trust-i NE nung world class football training agütsütsü

Imphal, Luchii/December 22 (Agencies): Lanurtem nem teyari agütsütsü asoshi Tata Trusts puri Northeast nung world class football training aser terenlok atema maongka agütsütsü asoshi sentong lir.
Tata Trusts outreach program ya linük nung football ajungketba sentong tulutiba rongnung ka lir aser iba sentong ya northeast nung lanur football asayartem atema lir aser talisa Manipur, Mizoram aser Meghalaya nung lanurtem atema lir.
Iba sentong kübok Tata Trusts aser Mizoram o Manipur sorkar longjemer tanur arishi küm 6 nungi 14 tsüngda alir parnok 4500 nem grassroots football centres (GFC) 90 ajanga world class football training aser terenlok agütsütsü asoshi sentong lir, ta Tata Trusts, sports tekolakba Biswanath Sinha-i ashi.
Tanabuba jenjang nung, sempet aketba tanur shirnok tawa amenokba Centre of excellence (CoE) nung lir parnok nem world-class training agütsütsü aji asünungdang parnok rongnung karbo Madrid (Spain), Athletic de Madrid Football Academy nung maneni küm asem training agitsü asoshi yoktettsü, ta Biswanath-isa ashi.
Mizoram nungbo küm asem tsüngda GFC 60 nung training agi tenzükogo aser Manipur nunga GFC 25 nung tawa training agütsü tenzükogo. GFC ajak nung tetsür densema tanur 50 training agitsü.
“Iba sentong nükjidong tongtibangtibaji sempet aketba lanurtem bushitettsü asoshi lir, aji asünungdang parnok international jenjang nung tokteptsü asoshi onoki mapang shidak nung tesayuba balala agüja anitettettsü. India nung footballer tem küm 15-16 asüdangang jangjar,” ta Biswanath-i ashi.
Luchii/Dec 17 nü Manipur sorkari Tata Trusts den CoE amenoktsü asoshi tezüluba nung tenangzüktepba ka yangluogo, kong football training den külemi kaket shisatsü agütsütsü.
Iba sentong Luchii/Dec tatemi mesera taruba küm Aenjeti/Jan tetenzüklen tenzüktsü asoshi Tata Trusts nungi telok kati Imphal aser temeket nung tang aliba infrastructure tem asadangdar.
Taoba ita 9 tejakdang Aizawl kübok CoE tasenba nung tanur 40 nem training agütsü tenzükogo.
Kasa mapang nung Tata Trusts aser Meghalaya football body longjemer tanurtem tilatem atema baby league ayonga kataki.