Centre indang ‘Anti-education Policies’ anema kaketshirtemi ola adoker

New Delhi, Luchii (December) 22 (Agencies): Centre sorkar anema aluyimertemi lungkak aitba sülen linük nung reju balala nungi kaketshirtemi New Delhi nung sorkar anema lungkak aittsü.
Kaketshirtemi Chattra Yuva Adhikar March kübok centre sorkar indang “anti-education” policy tem anema lungkak aittsü sentong lir.
Narendra Modi-i aniba sorkari “anti-education, anti-youth policies” yangluogo aser taküm October ita linük yimtiba nung Kisan Mukti March agiba ama onokia lungkak aitba sentong agitsü, ta kaketshirtemi ashi.
Iba sentong nung FTII, JNU, AMU, Allahabad University, Rajasthan University, AIIMS, BHU, TISS, Manipur Student Union aser Rozgar Mangey India o Ambedkar Periyar Study Circle, IIT Madras ama teloktemi shilem agitsü.
“2014 küm Modi-i kaketshirtem aser lanurtem tsüngdang aika nangzükba ajanga pa tashi angu. Ajisüaka, 2019 küm Modi-i maneni tashi angutsü pungmang ayuba nung kaketshir-lanurtemi tamakok ngudaktsütsü” ta kaketshirtemisa metetdaktsü.
“National Coordination for Chattra Yuva Adhikar March” (NCCYAM) ya December 28 nü sayatsü aser February 7, 2019 nungi national mobilization mapa tenzüktsü.
Kaketshirtem teloktemi applicant ajak asoshi hostel & scholarships, central university tasen 100, tetsür-tebur lemdangba ozüngtem agientsü, campus ajak nung anti-sexual harassment cell lapoktsü, contractualisation mapa anentsü aser sorkar mapa tazüngtem nung nisung shimoktsü takhangbatem agütsür.
Parnokisa shisaliok nung Hindu tamangba yimsü tesayubatem dendaktsüba anentsü aser campus nung academic autonomy agütsütsü atema akhanger.