NPCC-i Christmas salem metetdaktsür

Dimapur, Luchii (December) 22 (TYO): Asenoki asen Kibur aser Kümtetdakba Yisu Khrista asoba atema benjungdang, iba Khristmas ajanga asenok chichiba Khristan ka ka akümtsü aser Yisu agizüka asen tamang akangshidi, ta NPCC-i metetdaktsü.
Iba benjung ya tetezü aketba benjung ka südaktsüdi, koba ajanga asen sobaliba tajungji tangar asoshi tatishitsü südaktsüdi, ta parnokisa ashi.
Maneni, taküm Hindutva tashitem ajanga asen külem Khristan adianutem aser nübo agi tangar memenepertemi reshikangshi tia ajuruba asenoki sarasadem nung bilemtetdi. Tsüngremi asen linük reshikangshirtem ket nungi kümzüktsü ta asenoki imlar. India Linük Temzüng nung lateta aliba ama kobi melii linük nung senso shiai tamangba yimsü temeten angutsü imlar, ta NPCC-isa metetdaktsü.
Iba Khristmas ya tai toktepba aser putepshiba mapang ka südakjang ta moatsür. NPCC-i Nagaland nung alir ajak dangi Tepela Khristmas aser azükaruba Küm Tasen salem abener, ta NPCC President K. Therie-i sangdong ka nung ashi.