Noida nung taila Call Centre nung inyaker nisung 126 apu

Noida (UP), Luchii (December) 22 (Agencies): Hokolbarnü Noida police-i taila call centre ka nungi nisung 126 tashi apu. Parnoki US sensotem amokmerena tashiyim agi sen meshiba atema tai tonglokja apu.
Brihostibar aonung tesü police-i Nodia nung aliba call centre ka mita ao. Idangji tetsürtem dena operators aser callers apu aser police-i computer systems den sen lakh 20 dak tema apu, ta police-i metetdaktsü.
Iba taila call centre nung nisung 126 dak tema apu, computer systems 312 sota ayu aser sen lakh 20 dak tema apu, ta Gautam Buddh Nagar Superintendent of Police Ajay Pal Sharma-i ashi.
“Call centre nung inyakertemi US sensotem dangi phone asü aser parnok indang social security number nung timtem kar lir ta shia sen meshia agi” ta Sharma-isa ashi.
Call centre nung inyakertemi parnok Social Security Department ketdangsertem ta ashi aser US sensotem dang parnok indang social security pin auyaogo aser iba atema sen nüngdaker ta sa ashi.
Parnoki sen USD 3,500 tashi meshi aser ibaji US nung “playstore cards” alia belen. America, Dubai aser China nung parnok den yaritepertem ajanga call centre kiburtem sen angu, ta Sharma-isa metetdaktsü.
“Aonung shia call centre jagi America nunger ashiokja USD 50,000 shi aazük. Parnoki auyazükba senji crore aika lir” ta paisa shisem.
Call centre kiburtemji tesüiba küm asem shi ka National Capital Region kübok tesem balala nung mapa inyaka arur. Parnok mepudaktsütsü atema call centre shibangtsü aser ano lapoktsü ta süyonga aru. Call centre ji aonung 7:00 ako nungi anepdang 5:00 ako tashisa lapok.
Indian Penal Code kübok Arrla 308, 420 aser Information Technology Act kübok ken o balala nung parnok dak tai tongloktsüogo, ta paisa ashi.
Külen, IG Robin Hibu, Delhi-i Facebook nung osang ka sangoktsüba nung “Noida Sector 63 Police-i call centre nung inyaker Nagaland nungi nisung kar pua lir” ta ashi.
Parnokji, Longshi Humtsoe, Achumo Ezung, Edward Lothar, Samuel Ngullie, Avika Sumi, James Poumei, Inika Sumi, Aremba So, Jessica, Abu, Achung, Elina, Ashibo aser Nihokali nungertem lir. Anungji parnok chioktsü atema mapa inyaktsüla aser John Odyou: +919654213673 den osang tejangja metettsü atema tongtepratepang, ta Robin Hibu-isa metetdaktsü.