Neiphiu Rio-i Molungkimong nung First Baptistry Annexe lapoktsü

December 22, 2018 nü Molungkimong nung Nagaland chief minister Neiphiu Rio-i First Baptistry Annexe lapoktsüdang agiba noksa angur. 

Dimapur, Luchii (December) 22 (TYO): December 22 ya Nagaland atema tongtipang anogo ka lir kechiyong 1872 küm iba anogo nung Nagaland nung mezüngbuba Baptist arogo Molungkimong nung tenzük.
Rev. Dr. E. W. Clark-i nisung 15 tzüsenba ajanga iba arogo tenzük.
Tanü Nagaland chief minister Neiphiu Rio-i Molungkimong nung First Baptistry Annexe lapoktsütsü atema aru. Pa den Forest, Environment & Climate Change Minister C.M Chang, Urban Development & Municipal Affairs Minister Metsubo Jamir, NPWD Minister Tongpang Ozükum aser Industries & Commerce Advisor Imnatiba nungertem aru.
Neiphiu Rio-i Tsüngrem tenüng nung First Baptistry Annexe lapoktsü aser iba mapang pai, Molungkimong nungi Khristan yimsü prokshiba mapa maneni inyaktsü aser Tsüngrem aser alima tsüngdang Naga nunger tajung akümtsü imlar ta ashi.
ABAM Executive Secretary Rev. Dr. Mar Atsongchanger-i meshiteta sarasademtsü aser idangji pai “tarutsü putu nung alirtemi iba tesem atema asüngdangtsü aser idangji asenoki iba tesem nung nisung 15 tzüsenba ajanga Naga nunger ajak Khristan kümdaktsütsü ta ashitsü” ta ashi.
Sentong nung mendenji Tuli Town Baptist Arogo Asso. Pastor, Rev. Mapula Lemdur liasü aser mezüngbuba tzüsenba bilemteta Molungkimong Baptist Arogo Pastor-i Molungkimong lanur 11 tzüsentsü.
Chief Minister aser pa meina arurtem helicopter ajanga arur Molungkimong local ground nung anenzük.
Parnok Molungkimong tonga aruba sülen nokinketer 60-i meina parnok mezüngbuba Osangtajung lenmang (taoba mapang Ao-Ahom Trade Route) reprangi anir ao aser iba sülen First Baptistry Annexe lapoktsü atema First Baptist Pool-i ao.
First Baptistry Annexe sayatsüba sülen parnok First Gospel Gate-i anir ao aser idakji parnok sobaliba yimya nung pela agizük. Idak nung jagi parnok mezüngbuba Chapel hall aser Dr. E.W. Clark Monument repranga senzü.
Tatem nung Community hall nung lokti senden ka amen aser iba sülen chiyunger parnok nikongtsütsü 1:30 ako meta apusoa ao.