Kami Union Pfutsero küm 75 jungogo

Kohima, Luchii/December 21 (TYO): Kami Union Pfutsero, 75buba Anniversary “Our past our present-your future” omen nung ajemdaker Pfutsero jila nung Luchii/Dec 21 nü mungogo.
Iba anogo benjung nüngshilong minister for planning & coordination and land revenue Neiba Kronu-i lapokja liasü.
Sentong nung tetushi tesemdanger ka ama o jembiba mapang Kronu-i, tangar den tesendaktep tajung ayutsüba koda tongtiba iba indang jembiba den lokti dang tarutsü tajungba küma yanglushitsü atema ajungshia liasü.
Paisa Kami yimtsüng nungi asür Ngulo Khape aser Pfutseromi yimtsüng nungi asür Weprelo Mero na aser mezüngpur lenirtem mapa tajung asoshi tenüngsanga liasü.
Minister-isa, tulusang Tsüngrem akhümtsübuba aser yimtsüng o lokti balala tsüngda tesendaktep tajung aliba ajanga terenlok bener arur aser yimji yimjung nung alir, ta ashi.
Maneni Kronu-i, tang aliba sorkari Nagaland trenlok asoshi bendanga agüja inyakdar ta ashiba den nüburtem teyari nung sorkari lenmang aser tanga tenüngdakbatem yangluyonga aotsü ta nangzük.
Paisa lokti den tepela Khristmas aser küm tasen salem lemsatep. Iba sentong ya Weprenyi Kupa lenisüba kübok aka aser Kami nunger Pfutsero nung arua amenokba puti otsü tatsüka taoba Additional Director School Education Kewechelo Khape-i lemsatep.