Lok Sabha Speaker Mahajan-i AIADMK, TDP züngsem 19 anentsü

New Delhi, January 03 (Agencies): Tanü Lok Sabha Speaker, Sumitra Mahajan-i AIADMK aser TDP MP 19 anogo pezünü atema anentsüogo.
Cauvery ayongtzü onük nung ajemdaker senden nung rongrong adokdaktsüba atema yashia Speaker-i AIADMK züngsem 24 anogo pongunü atema anenja liasü.
Tanü anüngdang Zero Hour tenzükba sülen AIADMK aser TDP züngsemtem sabangleni oa Cauvery ayongtzü aser Andhra Pradesh state nem maongka balaka agutsütsü atema takhangba agutsü tenzük.
AIADMK züngsemtemi shidi merepdaktsü aser iba mapang nungji Parliamentary Affairs Minister, Narendra Singh Tomar-i longkak aitertem dang pei mendeni meyipa oa amentsü mepishi.
Ajisüaka India south tsütsü aliba tongti party anati maneni ola adoka longkak aitba yong Speaker-i parnok dang tekümdangtsü metetdaktsü saka parnoki tashi mangaba ajanga Speaker-i TDP MP 12 aser AIADMK MP 12 Lok Sabha Rule 374(A) nung ajemdaker senden pezü atema anentsü.
MP tem rongnung taoba mapang Civil Aviation Minister, Ashok Gajapathi Raju (TDP), Thota Narasimham (TDP) aser Renuka Butta nungera densema liasü.