Union Cabinet-i Arunachal Pradesh ST list melenshitsü melaogo

Guwahati, Aenjeti/January 3 (Agencies): Union Cabinet-i Bodhbarnü Arunachal Pradesh Scheduled Tribes (ST) list yanglushitsü atema bill ka benoktsü temelaba agütsüogo.
Iba bill ajanga state ST list nungi Abor kin agintsü atema benokdangogo, kechiyong iba kin ya Adi kin den kasa dang lir.
“Khampti” ta nüngja agütsür kin kecha mali asünung iba bill ajanga iba kin tenüng ya “Tai Khamti” ta ST list nung melenshitsü atema benokogo.
Maneni iba bill ajangasa Mishmi-Kaman (Miju Mishmi), Idu (Mishmi) aser Taraon (Digaru Mishmi) kin tem list nung züngoksemtsü atema benokogo.
Kasa mapang nung Momba kin melena Monpa, Memba, Sartang, Sajolong kin bendenloktsü atema benokogo.
Arunachal Pradesh ST list nung Naga kintem ta amshia aliba Nocte, Tangsa, Tutsa aser Wancho kin agi melenshitsü.
“Cabinet senden koba Ato Kilonser Narendra Modi lenisüba kübok aka parnoki Parliament nung Arunachal Pradesh Scheduled Tribes list yanglushitsü atema Constitution (Scheduled Tribes) Order, 1950 nung temelenshi kar bener arutsü asoshi Constitution (Scheduled Tribes) Order (Amendment) Bill, 2018 benok,” ta ketdangser sangdong ka ajanga metetdaktsü.
Arunachal Pradesh sorkari non-Arunachal Pradesh Scheduled Tribes (non-APST) nem permanent residence cerificates (PRC) agütsütsü asoshi high power committee osang ataba mapang nung tang Union Cabinet-i state ST list nung temelenshi bener arutsü atema temelaba agütsüogo.