Jammu & Kashmir election agitsü atema renema lir: Rajnath

New Delhi, January 03 (Agencies): Union Home Minister, Rajnath Singh-i, Jammu & Kashmir nung assembly election agitsü atema Centre sorkar renema lir, ta metetdaktsü.
State elections atema Modi sorkari security forces peria agutsütsü, ta pai shisem.
India temzüng kübok Arrla 35 nung ajemdaker Jammu & Kashmir nung Tir yimsüsüba benoka aliba dak sendakba nung tanü Rajya Sabha nung o lemtepba mapang tasüngdangba ka langzüdang Rajnath-i, election ketdangsüa agitsüji Election Commission mapa, ajisüaka Centre-i security forces peria agutsütsü renema lir, ta metetdaktsü.
Yaküm June 20 nü J&K nung Angh yimsüsüaba benoka liasü, iba sülen December 19 nü Tir yimsüsüba benok.
Rajya Sabha nung Opposition lenir, Ghulam Nabi Azad (Congress)-i, Jammu & Kashmir nung election agitsü atema Centre renema lir asü? ta asüngdangba langzüdang Rajnath Singh-i, “Election Commission-i yangji (J&K) election aginüra sorkari (central) ashishia mali,” ta metetdaktsü.
Yimtenren party balala dang tebilemba onük asüngdanga Rajnath Singh-i, state nung tesünep alitsü atema Centre sorkari tebilemba onüktem agizüktsü, ta ashi.
“Tebilemba onük ajak agizüka benoktsü renema lir. ajisüaka tang state nung tensa mejungi alibaji onok kija khuret ta magitsüla,” ta paisa ashi .
State nung yimjung malibaji BJP-i aniba NDA sorkar ajanga lir, ta opposition party temi tai tongloktsüba dak sendakba nung pai item o ya jembiogo.
Paisa, tesüiba mapangtem nunga state nung Angh yimsüsüba benokba sülen Tir yimsüsüba benokogo, tang ya mezüng masü, ta ashi.
Congress yimsüsüba mapang nunga state nung küm trok tashi Tir yimsüsüba liasü, ta paisa metetdaktsü.
Yaküm BJP-i Jammu & Kashmir nung People’s Democratic Party (PDP) den teloktep sorkar toktsüba sülen sorkar chirepa liasü.