2019 EE Rising Star Award atema Letitia Wright nominate süogo

Aenjeti/January 03 (Agencies): Taruba BAFTAs 2019 EE Rising Star Award atema ‘Black Panther’ film nung tongti shilem agila Letitia Wright nominate süogo, ta osangtem ajanga metetdaktsü.
Iba nüngtugu award sentong nung Letitia den külemi Jessie Buckley, Cynthia Erivo, Barry Keoghan aser Lakeith Stanfield nunger nominate süogo; aser arishi küm 25 tain Letitia-i ashiba agi, iba ama sentong tuluka nung sempet aketba actor aika rongnungi la shimba asoshi lai la den külem nominee asürtem nem tenüngsang agüja liasü.
” 2019 EE Rising Star Award atema maongka agütsüba asoshi BAFTA aser jury naprong nem kü mulungjang taroktiba nungi ni tenüngsang agütsür. Iba maongka ya kü atema konang tulu ka asütsü,” ta Letitia-i ashi.
Iba award sentong atema nominee asür tenüngtemji Rosamund Pike, Richard Madden, Ray Panthaki aser broadcaster Edith Bowman nunger densema jury teloki shimtetta liasü.
BAFTAs 2019 EE Rising Star Award sentong nung takok angur tenüngtemji Tsüklai/February 10 Deobar nü London nung EE British Academy Film Awards ceremony sentong agiba mapang sangdongtsü aser tang nüburtemi ee.co.uk/BAFTA ajanga vote agütsütettsü.