Chelsea puri Pulisic alizük

London, Aenjeti/January 3 (Agencies): America nunger international asayar Christian Pulisic shiba Europe nung football asayar rongnung ajaki aginüba asayar ka ama züngshir, pa Premier League club Chelsea puri Borussia Dortmund nungi Bodhbarnü £58 million ($74m) agi alizükogo, ta osang ka ajanga metetdaktsü.
Arishi küm 20 tain right winger ya Bundesliga dang nungibo Champions League nung timbaben asaya arudar, kechiyong coach Lucien Favre-i iba position nung England nunger asayar Jadon Sancho ang tasayadaktsünüba lir. Pa iba season madem tashi German league nung temaba jenjang nung aliba club nungi asayatsü asoshi loan nung tanaben yokogo.
“Ni summer nung Chelsea aser English Premier League nung oa asayatsü,” ta Pulisic-i ashiba Chelsea sangdong ka ajanga metetdaktsü.
“Iba amala nüngtugu club ka nungi asayatsü asoshi maongka anguba atema kanga pelar aser alima nung asayar tajungtiba tem sentepa aliba telok ka nung kanga meranga inyaka langka tajung agütsütsü imlaa atar,” ta paisa ashi.
Chelsea director Marina Granovskaia-i taruba küm tem nung Pulisic ya club nungi tongtibang asayar ka akümtsü imlaba lemsatep.
“Europe nung ajaki aginüba lanur asayar ka onok den adentsü asoshi tenangzüktepba yanglutetba atema onok kanga pelar.
“Christian-i pa dak aketba sempet Germany nung asayaba mapang sayuogo aser onoki taruba küm tem nung pa Chelsea asayar tongtibang ka akümtsü imlar,” ta lai ashi.
Pulisic shiba Premier League nung temaba jenjang nung aliba club Liverpool den sendaktepa liasü, pa arishi küm 15 asüdang nungi Dortmund nung asayar aser pa küm 17 asüdang Bundesliga aser United States nungi asayaa tenzük. Pai Crotia nungi asayatsü asoshi maongka agütsüba magizüki liasü.
Pulisic ya national Under-17 captain liasü aser 2018 Yimpoksüi/Nov nung pa arishi küm 20 ser anogo 63buba nung United States senior side captain tanobusang aküm.