I-League asayatem Hotstar & Jio TV nung sayutsü

New Delhi, Aenjeti/January 3 (Agencies): Club temi nongshiba sülen All India Football Federation aser commercial partners temi I-League asayatem ajak TV nung masü saka online platforms Hotstar aser Jio TV nung sayatsü telemtetba agiogo.
Hokolbarnü Imphal nung Neroca FC aser Shillong Lajong na asayaba asaya nungi tenzüka online ajanga asayatem sayutsü.
“Commercial partners Football Sports Development Limited (FSDL) den ken o asatepba sülen asayatem broadcast masütsü saka online ajanga sayutsü telemtetba agiogo,” ta All India Football Federation (AIFF) general secretary Kushal Das-i ashi.
“Item asayatem commentary, highlights aser replay dena sayutsü,” ta paisa ashi.
Minerva Punjab kibur Ranjit Bajaj-i Deobarnü I-League (Private) Clubs Association tenüng nung All India Football Federation (AIFF)-i asaya sayutsüba dak sendakba nung ken o mebentetra okadak ken o benoktsü ta amokmerenba sülen tang iba jenjang ya agiogo.
Iba lokti tentet ya Minerva Punjab, Chennai City FC, Neroca FC, Aizawl FC, Gokulam Kerala FC aser Shillong Lajong FC-i kümtet aser parnok longjemer AIFF-i I-League asaya tanungba 61 nungi 30 dang sayutsü telemtetba agiba anema nokdak.
I-League CEO Sunando Dhar-i, “Onoki asaya ajak sayutsü asoshi mulungtetogo aser football asaya ajak live sayutettsüsa inyaktetba atema kanga pelar aser fan temi pei sapuba team asaya ajak reprangtettsü,” ta ashi.
Honibarnü nungi tenzüka TV nung mesayuba asaya ajak Hotstar mesera Jio TV nung reprangtettsü.