NPF-i küm tasen salem lemsateper

Kohima, January 03 (TYO): Naga People’s Front-i Nagaland nung aliba nüburtem den 2019 küm tasen salem lemsateper; 2018 küm tu sentong aika agitetba küm ka liasü aser 2019 küm Naga nunger atema tajung aika ataloktsü imlar, iba denji külemi NPF-i Naga nunger taginüba ataloktsü atema tongtibangsüa inyaktsü, ta tanü Press Bureau, Naga People’s Front, Central Headquarter, Kohima sangdong ajanga metetdaktsü.
“Küm tasen nung ayaoka aidang NPF-i NDPP-i aniba PDA sorkar nem nüburtem melungjang nung teimla aser security alitsü atema inyakdaktsüner. Tim mesüi yimsüsüba temaitsü nguogo aser Legislature o Executive na tsüngda tesendaktep majungbaji tangari masü saka Home Minister-i sayuba tatishitsü tamajung ka lir. Ano item ama tongti onük nung Chief Minister-i ola madokba ajanga NDPP-i aniba PDA sorkar ya remote controlled sorkar lir ta sayur,” ta kasa sangdong nungsa shia lir.
“Nagaland nung gari lenmang terenlok dak sendakba nung NDPP-i aniba sorkari nüburtem dang nangzükba ama meinyaker. Naga nunger nem anogo 60/100 tsüngda gari lenang tajung agutsütsü ta nangzükbatemji tamasa lir. Asen state nung gari lenmang tajung yanglutsü atema asalentong tajung nüngdaker, aser ibaji kanga tongtibang. Taoba mapang T.R. Zeliang lenisüba kübok DAN sorkar kübok tenzükba tang teinyakdak lenmang projects rongnung; 1) Dimapur-Kohima 4-lane. 2) Dimapur city road, Golaghat gate- Zion Hospital junction 2-lane. 3) Purana Bazaar-Chumu Patkai bridge 4-lane. 4) New Check gate- Leirie 2-lane. 5). Kohima- Dimapur bye-pass road (Nuiland-Zhadima 2-Lane) aser 6) Dimapur city bye-pass road (Khatkati-Patkai College) lir, aser item lenmang projects ajak atema sanctions aser work orders ji 2017 küm agutsü, aser tangbo T.R. Zeliang leniba kübok meranga inyakba süngjang asenoki angur,” ta sangdong nung shia lir.
“PDA sorkari yazü dang nangzüker aser Nagaland nung gari lenmang terenlok atema projects mesüra scheme tasen metenzükteter. Projects melenshiba aser Naga nunger dang yazü jembiba nung dang parnok mazüngi lir. Tang NDPP-i aniba sorkari tilateri yanglushiba maparen nung dang takok angur, atangji nungbo iba ya tim department inyakyim ka dang lir. Gari lenmang tajung yanglutsü atema parnok asalentong mali, ajisüaka taoba DAN sorkari inyaktetba mapatem atema tenüng tajung agir. Mangdang melira India Ato kilonser mesüra Central lenirtem tanen makai ajuruba ajanga kecha mesütettsü,” ta sangdong nung shia lir.
“NPF-i maneni tajunglen agi opposition shilem agitsü, aser Naga nunger ajungtsü aser state renloktsü atemabo ajak inyaktsü. Küm tasen tenzükba den külemi NPF-i PDA sorkar dang nüburtemi imlaba ataloktsütsü aser nangzükba ama inyaktsü mepishir,” ta kasa sangdong ajanga metetdaktsü.