AASU 39buba lokti senden tenzükogo

Phek, January 04 (TYO): Aqahuto Tokukujo Kiphimi Kuqhakulu (Aqahuto Area Students’ Union – AASU) 39buba lokti senden January 4, 2019 nü tenzükogo, aser iba senden ya January 6 nü tashi agitsü; iba senden ya Shokhuvi yimdak ‘Envisioning Excellence’ omen nung ajemdaker ayongzüka akar.
Iba senden mezüngbuba anogo nung tetushi tejaokerji Commissioner & Secretary Finance & Land Resource, Y. Kikheto Sema IAS liasü.
Tetushi tejaokeri ‘Envisioning Excellence’ onük jembidang pai lanurtem dang, “Na lanur asüba mapang shinga nema na tetlatetshi tesüdaktsü saka jembiba, inyaksangshiba tamang aser temeshiba nung tangar atema tatishitsü tajung sayutetang,” ta ayongzük.
Kikheto-i, tajungtiba akumtsü atema mapang talangka agir, aser tajungtiba akumbaji tazüngba mesüra mapa nungdang masü saka asen libaliro ajanga-a ataloktsütsü akok, ta ashi.
“Maparen balala nung nai lenla balala ajanga tajungtiba jenjang alangzüktsü akok,” ta paisa ashi.
Paisa Phek district nung aluyimertemi alu nung züsentetba aonsotsütem nisung maliba marketing shed nung ayokba atema tenüngsang agutsü.
Pai ashiba agi, item ama marketing shed nung aonsotsütem jenjang zülua toktsür sen yutsütsü atema pongdang ka yutsür, yamaji ainlen jajartemi pei alinüba aonsotsü agir pongdang nungji sen shidak yutsür.
Kikheto-i, iba ya apiteta inyakba ajanga aluyimertemi mejangjaba nisungtem dak melung lemtetba sayur, ta ashi.
Pai kaketshirtem dang nükjidong tulu ayutsüla, ibaji ajanga temaba jenjangji metongtetaka iba sülen aliba jenjangjibosa tongtettsü, ta ashi.
Pai kaketshirtem dang, peisasa pei dak melung lemtettsüla, kechiyong takok angutsü atema ibaji kanga tongtibang, ta metetdaktsü.
Shokhuvi Baptist Arogo Pastor, Kiyezhe Chishi-i sentong tenzüka sarasadem, Shokhuvi Students’ Union-i sentong lapok aser Head GB Shokhuvi village, Ghotovi Zhimo-i lokti pelaa agizükba o jembia liasü.
General Secretary AASU, Zakali Aye-i report agutsü aser Aqahuto Area GB Association President, Victo Achumi-ia lokti ayongzüka jembia liasü.