Lenmang aser power atema nendaka inyaktsü: Kronu

Kohima, January 04 (TYO): K. Basa Village, Phek District nung January 4 nü Planning Coordination & Land Revenue Minister, Neiba Kronu-i, Naga nunger atema gari lenmang aser Power terenlok rongdak nüngdaker, ta metetdaktsü.
Iba dak sendakba nung Minister-i, gari lenmang aser light atema pai kanga tongtibangsüa inyaktsü, ta shia nüburtem dang pa nungittsü mepishi.
“Item onük ana nungji ni rangloker inyaktsü, ni sorkar den iba atemaji kanga nendaka inyaktsü,” ta minister-i metetdaktsü.
State sorkar senotsü peria meliaka asalentong junga yanglur inyakra ajakji takoktsü, aser iba atemaji nüburtem aser melungtet teloktem dang nungi amalitep nüngdaker, ta paisa ashi.
Tanü Phek district kübok K. Basa yimdak Chokri Area Games Sports Association CAGSA pur 49buba Sports Meet nung tetushi tejaoker o jembidang pai item o ya jembia liasü.
Naga nunger, talisa Phek district nung alirtem den küm tasen osang lemsatepdang pai gari lenmang aser power ajungkettsütsü atema nüburtem dang amalitepa nungittsü mepishi.
Kronu-i, Phek District ya Myanmar den kidanger lir, anungji gari lenmang tesendaktep aser power terenlok ajanga parnok den sendaktepra ibaji ajanga rongsenktettsüng ajungkettsü, aser nüburtem libaliro jenjang ajungkettsü, ta metetdaktsü.
“Ajakji khenyongibosa mataloktsütettsü, ajisüaka teimla tajung yur nendaka inyakra tarutsü nung mezünglongi nüburtem jenjang ajungkettsü,” ta pai ashi.
Kronu-isa sorkar dang gari lenmang aser power atema tongtibangsüa inyaktsü aser nüburtem taginüba ataloktsütsü mepishi.