Yisemyong kaketshir Telungjem tenteter küm 25 jungogo

Mokokchung, January 04 (TYO): Yisemyong Kaketshir Telungjem (YSU) tenzüker küm 25 ajungba washimung sentong “Jangyumedem” omen nung ajemdaker Yisemyong Baptist Arogo tenla kidang meraketa mungogo.
Tanü iba sentong nung alakteta jaoker 23 Impur Assembly Constituency MLA Dr. Imtiwapang Aier-i jembidang, tanü alima shirangdaktsüba ya “ochimashiba” ajanga lir, joko asen lokti nung ochimashibaji kanga aroka iogo, anungji, lanurtemi ochi mashiba maparen atsüteta intoktsü asoshi merangtsüla, ta ashi.
“Ochimashiba nungji shinga telok jenbua mali, anungji, lanurtemi iba anema khuret abentsüla aser nenok dak teimla lir”, ta paisa ashi.
Tanü kaketshirtemji temulungsentsü temerük lir, ibaji memenendaktsüi alima ainba den lirumedema bener aotsü asoshi paisa tayongzükba ka agütsü.
Ao kin nem “land of pioneers” ta tenüng agüja lir, anungji, iba tenüng tajungji bener lenmang balala nung tejakleni aotsü tim aser Ao lima ya rongsenkettsüng tsütsü “shisatsü muludak” ka kümdaktsütsü asoshi paisa ayongzüka liasü. Dr. Imtiwapang-isa YSU pur jubilee nüngtem adokba nüngo kaket tenüng agi “Shisatsü Aomensep” ta sür ka sayatsü.
Sentong nung odong jembir, Tir Yimyim Editor, K. Temjen Jamir-i “Jangyumedem” onük nung ajemdaker jembidang, asen jakdang tebilemtsü aika lir, item tebilemtsüji koktet nung dang nüburtemji jangyu medema otettsü aser jangyu medema aotsü atema Tsüngremi asenok nem agütsüba sempetji amshia alima renloktsü atema inyaktsü merangtsüla, ta ashi.
Pei atema kisüng bilemba jagi alima kodanga maintsü, anungji, jangyu medemtsü atema tangar asoshi mapa tajung inyaker kaka akümtsü aatema paisa teinyaktsü lenmang kar sayua liasü.