NE ya tasen India atema terenlok angudak kümdaktsütsü: Modi ; Citizenship (Amendment) Bill 2016 ya aibelenbatem metongshiba lir

Imphal/Silchar, January 4 (Agencies): BJP-i aniba sorkari Northeast tali renlokdaktsütsü aser India tasen akümba nung kishi ama kümdaktsütsü ta Prime Minister Narendra Modi-i Hokolbarnü nenshia metetdaktsü.
Imphal nung aliba Hapta Kangjeibung ground nung lokti sentong ka nung jembidang “Netaji (Subhas Chandra Bose)-i linük Nüjiso atema Northeast ya kishi lir ta ashi, BJP sorkari northeast ya linük renlokba indang kishi tasen ka südaktsütsü meranger” ta Modi-i ashi.
Prime Minister Modi-i tanü project 8 tashi tenzüktsü. Project rongnung Moreh nung Integrated Check Post, Maraori nung Dolaithabi Barrage Project, Khuman Lampak sports complex nung flood lighting systems 2 dena lir.
Paisa, Imphal East district kübok Sawombung nung FCI Food storage godown, Ukhrul district kübok Shirui yimtsüng nung Buffer water reservoir, Churachandpur district nung Improvement & upgradation of water supply, Kangpokpi district kübok Thangal Surung nung Eco-tourism complex, Noney district kübok Tupul nung Integrated Tourist destination aser Ukhrul district kübok JNV Lambui nung Water supply scheme tem tenzüktsü.
Modi-i tanü Imphal ghonda ka ser tesadang ka amungdang Dhanamanjuri University nung infrastructure development atema lung azüngtsü aser Langjing Achouba nung Astro turf football field yangluba mapa tenzüktsü.
Paisa 400 KV double circuit Silchar-Imphal line lapoktsüba sülen Assam kübok Silchar nung sentong ka nung adentsü atema apusoa ao.
Yashi Manipur nung opposition Congress party-i Prime Minister dang taoba mapang pa aser par party-i nangzükba onüktem atema kuli agüjang ta takhangba agütsü.
Congress Legislature Party leader Okram Ibobi Singh-i osangbener senden ka nung ashiba agi, “parnoki (BJP) nangzükba rongnung state sorkar mapa inyaker nem 7th Pay Commission agütsütsüba dena lir.”
CPI Manipur state council-ia yashi Irabot Bhavan nung osangbener den jembidang kasa onük jembi.
Tanü Prime Minister-i semdangba mapang Imphal nung shishilembadak ajak shibang. Manipur nung telungpur teloktemi PM-i semdangba anema mokdang.
Assam nung Citizenship (Amendment) Bill 2016 atema ashishitepba mapang ka nung tanü PM Modi-i Silchar nung “iba bill ya India lemdangba mapang aibelenbatem prayaschitta (metongshiba) lir” ta ashi.
Tanü Modi-i Assam nung 2019 Lok Sabha election nüboyimba sentong tenzüktsüdang “sorkari Citizenship (Amendment) Bill atema mapa inyakdar. Iba nung nübortem taküm sendaktepa lir. Iba ya kar ajangzüktsü atema masü. Iba bill ya India lemdangba mapang aibelenbatem metongshiba lir” ta metetdaktsü.
Tanü Silchar nung Modi-i Barak valley nung aliba Hindu Bengali nunger mesüzüktsü merangdang “kobi melii iba bill ya parliament nung agizüktsü imlar” ta ashi.
National Register of Citizens (NRC) nunga India senso ka danga mezüngdoktsü, ta paisa shisem.
“NRC nungi India senso ka danga mezüngdoktsü. Nenoki timtem ajuruogo saka iba mapa ya küm aika anendaka aliba tang tatembangleni arur” ta prime minister-isa metetdaktsü.
Paisa Assam Accord of 1985 nung Clause 6 indang olen ka jembidang “Sorkari Assam Accord nung Clause 6 mapa küma inyaktsü telemtetba agi. Iba ya Assam indang lokti, sobaliba aser oshi kümzüka ayutsü atema lir” ta ashi.
Panchayat election nung parnok posema nungitba atema Modi-isa Assam nunger dang pelaba metetdaktsü.
“Anogo ishika tejakdang panchayat elections nung nenoki BJP aser onok den yaritepertem posema nungitogo” ta pai ashi.
Sorkari northeast nung sen crore lakh 12 shi alang mapatongtem inyakdar, ta Modi-isa shisem.
“Tanü onoki sen crore lakh 12 dak tema mapatongtem tembanga inyakdar” ta Prime Minister-i metetdaktsü.