JDU-i Citizenship (Amendment) Bill anema noktaktsü

New Delhi, January 4 (Agencies): Tanü Lok Sabha nung Janata Dal-United (JDU)-i Citizenship (Amendment) Bill, 2016 anema noktaktsü lemtet.
JDU ya Bihar nung BJP den yaritepba telok ka lir.
“Hao, January 7 nü Lok Sabha nung Bill benokdang onoki anema noktaktsü” ta JDU national spokesperson KC Tyagi-i ashi.
Assam aser Northeast ajungalen alirtemi Bill anema noktaker ta party-i meteta lir aser sorkar nübortem taginüba anema meinyaktsüla, ta paisa shisem.
JDU-i Asom Gana Parishad (AGP) den asüngdangya sülen sorkar dang Parliament nung iba Bill mebenoktsü atema mepishiogo.
“Sorkari Bill benokra, onoki anema noktaktsü” ta Tyagi-isa metetdaktsü.
Lok Sabha nung JDU züngsem ana dang lir saka parnoki anema noktakbaji Bihar nungbo tongtipang asütsü, kechiyong BJP-JDU teloktep sorkar kümteta lir.
Brihostibarnü Joint Parliamentary Party (JPC)-i Bill agizük saka kasa senden nung opposition party 4- Congress, Trinamool Congress, Samajwadi Party aser CPM temi Bill anema noktak.
Assam nungi Congress MP Bhubaneswar Kalita-ibo Bill magizüker ta sayua senden nung medeni kimai alu.
“Onoki maneni Bill anema noktaktsü” ta Kalita-i osangbener dang ashi.