Block level Football aser Volleyball akatsü

Kohima, Aenjeti/January 04 (TYO): 78 Bn CRPF Zubza, Kohima aser Sechü Zubza football club na longjemer Aenjeti/January 17 aser 18, 2019 nü tebur block level football asayamung (Junior group) aser tebur block level volleyball asayamung (senior group) lemsa ayonga asayatsü lir.
Iba asayamung ya nüburtem inyaktsü sentong (civic action programme) kübok sepaitem aser nüburtem tsüngda tesendaktep tajungba yanglutsü nükjidong nung ayonga agitsü.
Osangtem ajanga angazükba agi, WAPO Ground, Sechü Zubza nung 17/01/2019 nü anepdang 09:00 ako nungi tenzüka agitsü aser iba asayamung lapokba sentong nung 78 Battalion CRPF, Sarbjit Singh, DIGP (OPS) CRPF Kohima, tongti tesemdanger ama aruagi adentsü; aser 18/01/2019 nikongtsütsü 04:00 ako nung shibangba sentong den külemi asayamung nung shilem agir, takok angur aser runners up telok nem saisapongba oset aser senpet sen agütsü renema lir.
Nagaland nung 78 Bn Central Reserve Police Force tenzükba mapang nungi küm shia nüburtem timtem lemsatepba nung lenji oa nüngdakba teyari agüja parnoki nüburtem den tesendaktep takangba yanglutsü asoshi sentong balala achayanga agia arudar.
Sechü Zubza yimtsüng kübok WAPO Ground nung iba asayamung ayonga agitsü aliba atema 78Bn CRPF, Commandant-i pelaba lemsatepa liasü. Paisa, iba asayamung nung Sechü Zubza block nungi tejangrartem aruagi adentsü asohi pelashishia jaok.
Osang tejangja metetnera, asayamung convenor Viketouzo Meyase (Mobile No. 9436604741) aser Sh. Hari Kumar S.L. (Mobile No. 700259123) na den tongtepratepang, ta kasa sangdong ajanga metetdaktsü.