49buba CAGSA asayamung tenzükogo

Dimapur, Aenjeti/Jan. 04 (TYO): Naga nunger lanurtem aser talisa Chakhesang nunger asayartemi international jenjang tashinung takok ngua shilem tajung agitetba asoshi kanga temulung chia bilemer aser achiajemba azüoka asayar yimya nung temang junga anepalutsüla, ta Minister for Planning Coordination & Land Revenue, Government of Nagaland, Neiba Kronu-i tanü lanurtem ayongzük.
Minister Kronu ya Phek district kübok K. Basa yimdak 49buba Chakri Area Games Sports Association (CAGSA) asayamung nung tongti tesemdanger ka ama arua dena asayamung nisan salatsüba mapang pai iba o ya jembia liasü. Kronu meina Entrepreneur Development Agency (EDA) tir, Küdecho Khamo aser party ketdangsertem arua aden.
Iba asayamung lapokba sentong ya CAGSA vice president, Vesekho Thisa-i ani aser K. Basa Baptist Church nung pastor, Kühuve Chüzho Tsüngrem temoatsü meshia sarasadem. Kasa sentong nung K. Basa Village Council Chairman, Vechohü Chüzho-i tarur pela agizüka liasü aser Naga Idol finalist Shenieta Cürha-i temeja ken ka tena telok lemladaktsü. Maneni CAGSA tir Vetazo Tetseo-i tir o jembi aser CAGSA Games & Sports secretary-i asayartem tezüngzüktep agia tongti tesemdangeri asayamung milen tsükloka asaya tenzük.
Anogo 9 asayatsü aliba iba asayamung nung tetsür tebur atema track event tenet, teburtem atema field event trok aser tetsürtem atema field event pongu lir, kong tetsür aser tebur football, volleyball aser basketball asayatsü lir.
Iba asayamung ya Aenjeti/January 14, 2019 anogo tembangtsü, kong Addl. Director, SIRD, Nagaland, Dr. Velüo Shijo-i asayamung shibangtsütsü.