Akhilesh aser Mayawati nati LS election atema longjemer

Lucknow, January 05 (Agencies): Lok Sabha election jakdang Samajwadi Party aser Bahujan Samaj Party nati lokteptsü bangjemogo, ta tanü SP lenir kati metetdaktsü.
Uttar Pradesh nung party ana longjemba teloktep “gathbandhan” osangji tan ita official süa metetdaktsütsü, ta SP otongdar, Rajendra Chaudhary-i metetdaktsü.
Osangbener den jembidang pai, Samajwadi Party Tir, Akhilesh Yadav aser BSP tongti lenir, Mayawati na tsüngda senden aika amenba sülen party na lokteptsü bangjemogo, ta metetdaktsü.
Paisa, yashia lenir ana Delhi nung ajurutepogo aser tanga party tem dena tejembidak lir, ta metetdaktsü.
“SP tongti Akhilesh Yadav aser BSP tongti Mayawati na senden aika menogo. Yashia tena Delhi nung ajurutepogo. Iba teloktep nung party tilatema dendaktsütsü atema jembidar,” ta pai metetdaktsü.
Item party rongnung Rashtriya Lok Dal (RLD) densema lir, ta pai shisem.
Iba teloktep nung Congress-a dendaktsütsü asü? ta asüngdangba langzüdang Chaudhary-i, “Ibaji Akhilesh Yadav aser Mayawati nati lemtettsü,” ta ashi.
Ajisüaka Amethi aser Raebareli menden na atemabo candidates metoktepdaktsüsü, ta pai ashi. Lok Sabha menden ana ya Congress Tir, Rahul Gandhi aser United Progress Alliance tongti, Sonia Gandhi na toktepba menden lir.
Lok Sabha election nung Uttar Pradesh ya kanga tongtibang, kechiyong iba state nung Lok Sabha menden 80 lir.
Yaküm Lok Sabha menden asem atema by election nung opposition party temi Bharatiya Janata Party tamakok ngudakja liasü.
Yaküm May ita Kairana Lok Sabha by-elections nung joint opposition candidate, RLD nungi Tabassum Hasan-i BJP candidate madak takok ngua liasü. Yaküm March ita nunga BJP-i Lok Sabha bye election- Gorakhpur aser Phulpur menden na nung tamakok angu.
2014 küm Parliamentary elections nung UP nung BJP-i menden 80 nungi menden 71 tashi nung takok ngua liasü, Samajwadi Party-i menden pongu aser Congress-i menden ana nung takok ngua liasü.