WWE Raw nung Hulk Hogan tanaben shilangtsü

Aenjeti/January 05 (Agencies): Asür Gene Okerlund (‘Mean’) shiba nüngtugu wrestling asayar tejen Hulk Hogan den mapang talangka nungi tembar süa arua liasü; pa nem tetushi agütsüba temaitsü sayua Hogan-i tanaben ‘WWE Raw’ nung shilem agitsü ternemba lir.
Arishi küm 65 tain Hogan ya 2015 küm WWE nung sensaksemba reecord asüba ka nung pai o mekümdangi jembiba sülen nungi iba asaya nung shilem magidaktsü.
Ajisüaka, Bodhbarnü (02.01.19) Okerlund asüba osang angazüka pai pa tembar nem tetushi aser tena küm talangka medema aruba tepela temaitsü sayutsü asoshi WWE nung tanaben aruagi shilem agitsü Hogan-i metetdakja liasü.
Nüngtugu wrestler ana (Hogan aser Okerlud) ya küm aika medemer tajung ama tesendaktep yua aruogo aser tena longjema shilem agiba ajanga alimai tena tali dang metetta aküm.
Iba tetushi temaitsü sayua Hombar aonung 07.01.19 ‘Raw’ episode agiba sentong nung Hogan aruagi adentsü ternemba lir, ta kasa osang ajanga metetdakja liasü. Okerlund ya arishi küm 76buba nung asü.
“WWE Hall of Famer Gene Okerlund asüba osang angazüka WWE-i tejashi lemsateper. Saisapong aser entertainment otsü nung pai shilem tajung agiba alimai jangjaa lir. Pa arishi küm 76buba nung süogo,” ta WWE-i lemsatep.
1984 küm Okerlund-i WWE nung ajemoka shilem agi tenzük aser pa dak sempet tajung aliba ajanga Hogan, ‘Macho Man’ Randy Savage aser Ultimate Warrior nunger ama pa wrestling asayar mongin ka aküm.
American Wrestling Alliance nung shilem agiba sülen Vince McMahon-i Okerlund WWE company nung aniokba pai shilem tulu agi. Okerlund-i wrestling tsütsü nüngtugu show talisa ‘Tuesday Night Titans’, ‘Wrestling Challenge’ aser ‘Prime Time Wrestling’ tem nung shilem agiogo.
2006 küm Okerlund indang tembar tajung Hogan-i pa WWE Hall of Fame nung anioka liasü.