Rakhine telungpurtemi police post 4 amak

Yangon, Aenjeti/January 5 (Agencies): Buddhist nunger Rakhine telungpurtemi Hokolbarnü linük nüjiso anguba anogo nung police post pezü maka Myanmar security force tenet tashi tepsetogo, ta military otongdar aser telungpur telok lenirtemi metetdaktsü.
Taoba küm December ita nungi tenzüka Myanmar nung linük sepai aser Arakan telungpur tsüngda raraa arudar. Iba rara ya Buddhist Rakhine nunger nem nüjiso tali agütsütsü akhangba ajanga adok.
Rakhine tesem nung ya 2017 küm mepetmesü adoka Rohingya Muslim nunger noklang aika kidanger linük Bangladeshi mintokogo.
Tawa Arakan telungpurtem den raraba ajanga nisung 2,500 pei ki toktsür jenshiogo, ta United Nation sangdong ka ajanga metetdaktsü.
Arakan telungpur otongdar Khine Thu Kha-i ashiba agi, parnoki police post pezü amak aser tsükchir tasümang tenet tashi ngutetogo.
Parnokisa Myanmar security force züngsem 12 pua lir, ta paisa ashi. “Onoki international temzüng ozüng dak ajemdaker parnok ken o asadangtsü. Onoki parnok dak mekongshitsü,” ta pai ashi.
Tang parnoki police post amakba ya taoba hopta ishika tsüngda Myanmar military-i Arakan telungpur anema inyakba aser civilian tem dak tenük yoker amakba atema telangzüba agütsüba lir, ta paisa ashi.
Myanmar military-i taoba hopta linük nung north aser northeast tsütsülen telungpur teloktem, shirnoki nüjiso khanga arudar parnok den yimjung ken o jembishinütsü atema hopta pezü meraratsü sangdonga liasü, saka iba sangdong nung Rakhine densema mali.
Myanmar state media-i Mongolbarnü, kasa telok yagi police maka sepai ka kanga mejungi yirutsüba sangdonga liasü.
Myanmar military otongdar Zaw Min Tun-i Reuters dang ashiba agi, linük north tsütsü Buthidaung aser Maungdaw jila anasa Bangladesh den arrtsü nung police post tem amakba dak sendakba nung security force temi jenjang tapet agia inyaksangshidar.
“Military-i maneni iba tesem kümzüka ayutsü atema meita aoba maparen inyaktsü,” ta paisa ashi saka iba lendong nung nisung tepsetba aser apuba indang osang kecha magütsü.
“Item police post tem ya lisopur kümzüka ayutsü atema amenokba lir anungji item ya mamaktsüla,” ta Zaw Min Tun-i Buddhist nunger lokti tentet ateshia ashi, shirnok Myanmar lisopur ama agizüker. Item telok rongnung Rakhine nunger densema lir saka Rohingya nungerbo densema mali.
Zaw Min Tun-i ashiba agi, British nunger ket nungi Myanmar nüjiso ngur küm 71 ajungba anogo linük tesem balala nung wako atsüketba sülen minute ishika dang lir telungpurtemi police post tem maka liasü.
Arakan telungpur lenir Khine Thu Kha-i, linük nüjiso anguba anogo atemer parnoki police post tem amak masü, ta ashi.
“Onok ano nüjiso mangu, Tanü ya linük nüjiso anguba anogo lir,” ta pai ashi.