Lee Chong Wei training agi tenzükogo

Kuala Lumpur, Aenjeti/January 5 (Agencies): Malaysia nunger nüngtugu badminton asayar Lee Chong Wei cancer agi shirangba ajanga masayai arur Hokolbarnü nungi training agi tenzükogo, ta ketdangser sangdong ka ajanga metetdaktsü.
Alima nung temaba jenjang nung mapang talangka alisang ya kanga dang tejangraba tulu nung aliba nguogo aser taruba hopta nungibo asaya tenzüktsü imlar, ta Badminton Association of Malaysia secretary-general Ng Chin Chai-i AFP dang ashi.
“Pa gym nung gym instructor den külem cycling süa aliba nguogo. Pa taruba hopta nungibo court nung training agitsü sentong lir,” ta pai ashi.
Lee, taoba küm tom nung cancer tashidak aliba putetba sülen asaya anen aser iba ajanga pa regional games aser world championships nung shilem magitettsüsa aküm.
Pa teni nung cancer tema aliba putetba sülen pai Star newspaper dang December ita ashiba agi, Taiwan nung pa proton therapy treatment 33 tashi agiogo koba tekangshi ulura liasü.
Item timtem tekangshi ajuruaka Olympic nung silver medal asemben tashi koker alisang yagi ashiba agi, pa Tokyo 2020 Summer Games nung asayatsü asoshi nükjidong aliba metoktsütsü. Pa qualify süra iba ya pa asoshi Olympic nung pongubenbuba shilem agir asütsü.
Arishi küm 36 asayar yagi Summer Games asemben atonga Malaysia asoshi Olympic nung gold medal kadanga mongutsüteti aruogo.
Pai tatemsa Rio 2016 Games nung merangdanga liasü, kong final nung pa China nunger Chen Long-i tsükdaktsü.
Lee taküm nung teni cancer agi atongba ya takoksa tuluba asütsü südi, shiba 2014 world championships matong tsüngda ozüng alema mozü amshiba atema tenokdangba agüja liasü.