Kechiba PDA sorkari VDBs nem grant-in-aid magütsür?: TR Zeliang

Dimapur, January 5 (TYO): State Finance department-i agüjaka kechiba Nagaland state sorkari Rural Development (RD) department kübok Village Development Boards (VDBs) nem grant-in-aid magütsür ta Opposition Naga People’s Front (NPF)-i asüngdang.
Nationalist Democratic Progressive Party (NDPP)-i aniba People’s Democratic Alliance (PDA) sorkar ya March 2018 nung kümtet aser March 2018 nung Finance department-i RD department nem Rs. 185.09 crores agütsüogo. Ajisüaka, Nagaland state sorkari VDBs nem grant in aid magütsür aser iba atema ashishiteper, ta Honibarnü Leader of Opposition TR Zeliang-i osangbener dang ashi.
November 8, 2017 nü NITI Ayog ajanga Ministry of Rural Development, Government of India-i Nagaland nem additional grant Rs. 185. 09 crores agütsü. Inyakyim nung lateta aliba ama December 13, 2017 nü Nagaland Governor-i Chief Secretary menden ser High Level Committee (HLC) ka tentet, ta TR Zeliang-i ashi.
Iba Committee ajanga 2015-16, 2016-17 aser 2018-19 atema grant in aid ama Rs. 96 crores agütsütsü mulunga agizük. Ajisüaka, January 18, 2018 nü Election Commissioner-i state assembly election indang osang sangoktsüba sülen model code of conduct tenzük aser iba jagi taoba DAN sorkari sen magütsütet, ta paisa shisem.
PDA sorkari inyakyim lateta alibatem alema Committee-i lemtetba ama sen magütsür, anungji state Governor-i iba onük atema mapa inyaktsüla aser pai tentettsüba Committee-i ashiba ama kechiba mapa meinyaker ta asüngdangtsüla, ta TR Zeliang-isa ashi.
Paisa Citizenship Bill 2016 tebilemtsü atema olen ka ashidang, “State cabinet-i June 5, 2018 nü Bill anema menokdaktsü ta lemtetba atema ni chief minister Neiphiu Rio dang nungi kuli metetnüa shidi zülu. Saka tanü tashi telangzüba kecha mali” ta ashi.
Iba Bill ya Naga nunger atema tajangzük süra, state sorkari posema nungittsüla, saka Bill nung keta alibatem memeteti Nagaland sorkari national policies nung tebang maitsü ta ashibaji tai lir., kechiyong iba bill ajanga Naga nunger maitsü atema lendong bentsür arutsütsü, ta TR Zeliang-isa shisem.