NESO-i January 8 nü Northeast bandh ayonger

Guwahati, January 5 (Agencies): Northeast Students Organisation (NESO)-i January 8 anepdang 5:00 ako nungi nikongtsütsü 4:00 ako tashi Northeast ajunga mokdangtsü ayongzükogo.
NESO nung All Assam Students’ Union, Khasi Students’ Union (KSU), Garo Students’ Union (GSU), All Arunachal Pradesh Students’ Union (AAPSU), Naga Students’ Federation (NSF), All Manipur Students’ Union (AMSU), Mizo Zirlai Pawl (MZP) aser Tripura Students’ Federation (TSF) teloktem dena lir.
NESO-i Citizenship Amendment Bill, 2016 magizüker aser Hokolbarnü Cachar nung Prime Minister Narendra Modi-i iba bill atema jembiba aitsür, ta NESO-i tanü metetdaktsü.
Silchar anasa Kalinagar nung yashi public sentong ka nung PM Modi-i jembidang “India sorkari Parliament nung Citizenship Bill, 2016 agizüktsü imlar” ta ashi.
“Assam nungertemi joko teinyaktsü kecha mali kümogo, onok lendongbang nung lir. Bill anema onoki mokdang ayongzüker. January 23 nü Guwahati nung onoki India sorkar aser Citizenship Bill anema noktaker ta shia lokti sentong tulu ka agitsü” ta tanü AASU Secretary, Lurin Gogoi-i osangbener dang ashi.
NESO mendenpurtemi tanü osangbener senden ka nung jembidang “Northeast nung lisopurtem taginübatem anema India sorkari mapa inyaker. India sorkari iba mapa inyakba nung lendong keta lir aser Northeast nung bendangertemi lisopurtemi amokbangtsü” ta ashi.
“Iba atema onoki January 8 anepdang 5:00 ako nungi nikongtsütsü 4:00 ako tashi NE Bandh alitsü ayongzüktsüsa akümer” ta NESO mendenpurtemisa shisem.
NESO-isa India sorkar dang vote angutsü mechi nung Northeast nung lisopurtem temulung meyirudaktsütsü atema kümdangtsü metetdaktsü.
Parnokisa Northeast nung alirtemi iba mokdang nung shilem agitsü mepishia metetdaktsü.
“Northeast ya ozüng alema arurtem tejenokdak ka masü ta asenoki India sorkar nem osang tejangja sangoktsüdi” ta parnoki ayongzük.
NESO-i mokdang ayongba ya Assam dak alia Arunachal Pradesh, Nagaland, Manipur, Tripura, Mizoram aser Meghalaya nunga takok ngua agitsü imlar.
NESO nung züngsem aliba telok ajak- AASU, Khasi Students’ Union (KSU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (Amsu), Garo Students’ Union (GSU) aser All Arunachal Pradesh Students’ Union (AAPSU) temi Centre dang Citizenship Bill agientsü atema takhangba agüja arur.
Maneni, January 8 nü NESO dak alia AKRSU aser Assam Chah Mazdoor Sangha (ACMS) teloktemia takhangba balaka agüja mokdangtsü ayongzüka lir.
NESO-i ghonda 11 Northeast bandh ayongba den külemi AKRSU-i ST jenjang meshia ghonda 12 mokdangtsü ayongzüka lir.
Ano, ACMS-ia süngolu nung mapa inyakertem itasen tujang ta takhangba agüja kasa anogo nung lungkak aittsü sentong lir.