Ao nüknürar ken ‘a teti Meimtsü’ sayaogo

Dimapur, January 05 (TYO): ‘Na teti Meimtsü’ ta sür Ao Nüknürar ken Bendangtoshi ajanga adokogo; iba audio CD ya Dimapur nung December 31, 2018 nü taoba mapang nüngtugu kentener aser Joint Director, SCERT Nagaland Kohima, Moa Longkumer-i sayatsüogo.
Ken tasen sayaba sentong ka medemer aser adianutem den agidang pai, kentenba sempet ya Tsüngrem nungi anguba sempet tajungtiba rongnung ka lir, ta ashi.
“Iba kensep ya temeim ken ka asünung iba ken ajanga nüburtem mulungsentsü nung temeim kadaktsütsü aser iba ken angar shia jangratemdaktsütsü imlar; maneni Tsüngremi agütsüba sempetji amshia tarutsü nunga yamala kensep adoka nüburtem mulung akasodaktsütsü merangtsüla,” ta paisa ayongzük.
Iba ken atensangi, kensep aika nung shilem agia aruogo saka pei jurila kensep kabosa adoktsü ta nükjidong ayuba ama iba kensep küm talangka süia oaka adoktetogo, iba asoshi Tsüngrem nem tenüngsang agütsür aser iba ken angashir ajak jangratema angatsü imlar, ta ashi.
Paisa ashiba agi, Pa tanur asüdang nungi künübosa Naga lima nung kentener tajungtiba rongnung ka asütsü nükjidong yur ken kanga jangra tena aruba ama, 2002 küm “2nd Hornbill Open Beat Contest” nung Best Vocalist senpet ngutet.
Tsüngremi kententsü sempet agütsüba asoshi Tsüngrem dang pelar aser iba kensep adoktettsüsa shirnokisa nübo, rongsen aser maparen balala ajanga yaritepogo, nenok ajak dang pelar, ta kentenerisa metetdaktsü.
Iba kensep ya Kohima nung Bible House New NST, Kohima, Mokokchung nung Glitzy dokan IM Road, Elite Hostel anasa angutsü aser iba Mobile No. 9436275111 ajanga tongteprateptsü akok.