India-i 7 buba Junior Asia Cup Hockey semifinal asayatsü

Changzhou, September 10 (Agencies): India’er tetsür hockey asayartemi Malaysia madak goal 9-1 agi takok anguba sülen tang tasayadak 7 buba Women’s Junior Asia Cup asayamong semifinal asayatsü jenjang tanü Brehostibar nü nguogo.
Tanü asaya nung India captain, Rani Rampal-i India telok asoshi goal 3 tashi agüja hat-trick yanglua liasü.
India tsür, Preeti Dubey-i tanü asaya tenzüker minute 8 buba nung Rani-i renemtsüba cross ball agizüka 1 buba goal agütsü aser Jaspreet Kaur-i minute 15 buba 2 buba goal agütsü.
Asaya mezüngbuba shilem tembangtsü minute 6 anünga alidang Preeti-isa goal 1 agüja India goal 3-0 agi temaba jenjang nung ajungkettsü.
Ajisüaka, Malaysia tsür Mohd Saiuti Norfaiezah-i asaya mezüngbuba shilem tatembanglen goal 1 agüja India nem goal 1 meyiptsü.
Asaya tanabuba shilem nung, asaya tenzüker minute 37, 39, 41 aser 42 buba nung India tsürtemi maneni goal 4 tashi agüja tanü kanga junga asaya.
Tesülen, Poonam Balra-i asaya tenzüker minute 51 buba nung goal 8 buba agütsüba den külemi, lai asaya tembangtsü minute 1 anünga alidang goal 9 buba aser takokba goal agüja India nem takok bener arutsü.
India-i par semifinal asaya tan Honibar nü asayatsü saka koba telok den iba asayaji asayatsü iba osangbo tang tashi memetetdaktsüi lir.