Karan Johar indang project ka nung Vicky Kaushal adentsü

Aenjeti/January 14 (Agencies): Tawa-tanü ka ajaki telangzüba tajung den tenüngsang agütsüba film ‘Uri: The Surgical Strike’ nung actor Vicky Kaushal-i tongti shilem agiba ajanga alimai pa tali jangjaa kümogo.
2018 küm box office nung takok tulu anguba film ‘Raazi’ aser ‘Sanju’ nung Vicky-i takok ngua shilem agiba sülen taküm küm-a, Uri film ajanga pai ano takok tajung nung tenzükogo.
Vicky, shiba industry nung pa nübo atema takangba tulu lir, pai Karan Johar indang taruba project ‘Takht’ kong Ranveer Singh aser Kareena Kapoor Khan densema tangartem shilem agitsü lir, parnok rongnung Vicky adentsü.
Osangtem ajanga angazükba agi, KJo-i produce asütsü aliba horror film tanga ka nunga Vicky nem tongti shilem lemzüktsüogo. Iba denji külemi ‘Takht’ film ya taküm küm tom ka nungi tangok tenzüktsü.
KJo indang nüngja agüja maliba film ya Vicky indang mezüngbuba horror film ka asütsü. Iba film nung Vicky den külemi Bhumi Pednikar-i shilem agitsü ternemba lir.