Congress-i High Court judge ka nem bushisüngdang südaktsütsü akhanger

Agartala, January 14 (Agencies): January 9 nü West Tripura nung police-i injang khatokdang nisung 15 shi ka yiruba aija state Congress-i judicial inquiry asütsütsü takhangba agütsür.
Tang teinyakdak high court judge kati bushisüngdang asütsüla aser yirua aliba lisopur lanurtem nem sen teyari agütsütsüla ta Congress-i akhanger.
Congress-i tang teinyakdak high court judge ka nem bushisüngdang südaktsünür. Yamaji asü nung dang ochi temai adoktsü aser tatalokba kuli metettsü, ta Congress lennir aser taoba MLA Tapas De-i ashi.
State sorkari tuyuba magisterial inquiry ajanga kecha mebushitettsü kechiyong magistrate kaji administrative officer ka lir aser state sorkar talenba alema meinyaktettsü, ta Tapas De-isa shisem.
Tripura nung tensa kanga mejungi küma aoer aser iba atema Congress teshimtet telok kati DGP den ajuruteptsü aser Congress züngsemtem aser lennirtem asoshi security meshitsü. BJP-i Congress züngsemtem reshikangshir, ta paisa metetdaktsü.
January 8, 2019 nü Northeast Bandh alidang police-i injang khaloktsüdang lanur 6 tashi yiru. Parnok rongnung nisung anabo kanga mejungi yirur anepaludar.
Iba lendong atalokba sülen teyirurtem ambulance ka nung mozü kidangi anir ao saka police-i ambulance nunga injang khaloktsü.
Iba tatalokba sülen West Tripura nung Section 144 crpc ozüng agütsü aser Lok Sabha nung Citizenship Amendment Bill agizükba sülen Tripura nung ghonda 48 atema mobile internet aser messaging service shibang.