Messi-i La Liga nung goal 400buba idaktsü

Madrid, Aenjeti/January, 14 (Agencies): Lionel Messi-i Deobarnü La Liga nung goal 400buba idaktsüogo, koba coach Ernesto Valverde-i “monstrous” ta jatsüa liasü. Deobarnü Eibar madak takok anguba sülen Barcelona point table nung tanabuba jenjang nung aliba team dang nungi point 5 agi timba kümogo.
Asaya nung Luis Suarez-i pass asüba ball ka idakja Argentina nunger asayar yagi otsü tasen ka yangluogo. Kasa asaya nung Luis Suarez-ia goal ana idakja liasü.
Asaya goal 3-0 agi akokba sülen Valverde-i ashiba agi Messi-i ajangtetba ya tesüngmangtsüka lir. “Iba ya o agi dang ashitsübo temela saka goal ka khen ka khen ta idaktsütsü ya temela masü koba mapang talangka agiang ajangtettsüba mapa ka lir,” ta pai ashi.
“Pa ya khenyongi balaka. Pa tanga alima ka nungi lir,” ta paisa ashi.
Iba takok ajanga Valverde-i aniba telok ya Atletico Madrid dang nungi point 5 agi timba kümogo, shirnoki anogo tetenzüklen Levante koka mapang tatsüka atema Barca point ana agi dang memenepi liasü.
“Ano mapang talangka anunga lir. Iba ya anisüngzük ka lir saka ano kecha majangtet,” ta Valverde-i ashi.
Real Madrid puria Real Betis madak takok nguogo. Real pur point 10 agi Barcelona dang nungi tajemba lir.
Kasa mapang nung Messi-i maneni goal idakja league nungi goal timtiba agütsür kümogo, koba Cristiano Ronaldo dang nungi goal 89 agi timba lir.
Ronaldo shiba dang Juventus nungi asayadar pa goals-to-game ratio tajungba lir. Pai asaya 292 nung goal 311 idakja liasü. Messi-i goal 400buba ya asaya 435buba nung idaktsü.
Eibar den asaya nung Messi-i kangabo asaya amokbanger masaya aser tanga team ka nung asünungbo Suarez mesera Philippe Coutinho tenüng ang sanger lila.