Küm 3 sülen Kanhaiya Kumar aser tangartem dak tai tongloktsür

New Delhi, January 14 (Agencies): Taoba mapang Jawaharlal Nehru University Students’ Union (JNUSU) president Kanhaiya Kumar aser tangartemi linük anema mapa inyak ta asüba ken o ka atema Hombarnü Delhi Police-i okadak parnok dak tai tongloktsüba chargesheet ka benok.
Tanü Delhi Police-i benokba tapak 1,200 aliba chargesheet 2016 küm Jawaharlal Nehru University campus nung ayonga agiba sentong ka nung linük anema yimyimtem ayimba atema lir.
Parliament amaktsü tasa atongsang Afzal Guru alensetba sülen Kanhaiya Kumar, Umar Khalid aser Anirban Bhattacharya nungertemi iba sentong ayongzüka agi.
Iba ken o benokba aser Kanhaiya Kumar, Umar Khalid o Anirban Bhattacharya nungertem police apuba atema opposition-i ashishitep aser Delhi Police-i BJP tetuyuba ama inyaker ta tai tonglokja liasü.
Tanü Delhi Police-i Patiala House court nung chargesheet ji benok aser Metropolitan Magistrate Sumit Anand-i Mongulbarnü okadak ka nung benoktsü atema agizük.
“Onok anema charge sheet benok ta asüba osangji shitak süra, ni police aser Modi dang kanga pelar. Küm 3 sülen elections agitsü anasa charge sheet benokba ajanga iba ya yimtenren tsütsü shir inyakba mapa ka ta jungkai adoka sayur. Ni asen linük indang judiciary dak temulung alemer” ta tanü Kanhaiya Kumar-i ashi.
Delhi Police-i benokba chargesheet nung nisung 10 dak tongti süa tai tonglokja lir. Parnokji Kanhaiya, Khalid, Bhattacharya aser Kashmiri kaketshir 7- Aquib Hussain, Mujeeb Hussain, Muneeb Hussain, Umar Gul, Rayeea Rasool, Bashir Bhat aser Basharat.
Maneni, iba ken o nung Shehla Rashid aser CPI lennir D Raja’er jala Aparajita Raja nungertem dak-a tai tongloka lir.