CAB atema Assam & Manipur CM temi Rajnath den ajurutep

New Delhi, January 14 (Agencies): Assam chief minister Sarbananda Sonowal den Bodo lennirtemi Hombarnü Home Minister Rajnath Singh den ajurutep.
Northeast ajungalen Citizenship Amendment Bill anema lungkak aitba onük atema parnoki Rajnath Singh den ajurutep aser idangji pai Assam nunger sobaliba aser oshitem kümzüka ayutsü ta nangzük.
Maneni, Manipur Chief Minister N Biren Singh-ia Home Minister Rajnath den ajurutep aser Manipur nung lisopurtem dak sendakba onüktem lemsatep.
Tang tesüsabuba Parliament indang Winter Session alidang Lok Sabha nung Citizenship Amendment Bill agizükba sülen nübortemi Bill anema lungkak aitba tuluba nung inyaka arur.
Home Minister Rajnath Singh-i yakta North-East chief minister tem den senden ka amentsü. North-East nung aliba lisopurtem sobaliba aser oshitem kümzüka ayutsü atema pai olemteptsü, ta Centre-i tanü metetdaktsü.
Assam Accord nung Clause 6 mapa küma inyaktsü atema Centre-i luden ka tentetba nung shimoker aikati memulungba mapang ka nung Rajnath-i chief minister tem den külem senden ka amentsüba osang metetdaktsür asütsü.
Tanü Assam kübok Majuli nung lungkak aitertemi Citizenship (Amendment) Bill anema Chief Minister dak wako tanak ayiploktsü. Chief Minister Sarbananda Sonowal tanep helicopter ka ajanga sentong ka nung adentsü atema Majuli-i ao.
Pa idakji anenli lungkak aitertemi pa aser Centre sorkar anema yimyimtem ayim. Parnokisa ashishitep aketba Bill meyipa agitsü takhangba agütsü.
Lok Sabha nung Citizenship (Amendment) Bill agizükba sülen North East kübok state 7 nung lisopurtemi lungkak aiter.
Iba inyakyim ajanga Assam nung Asom Gana Parishad (AGP)-i BJP den teloktep sorkar nung madentsü lemtet. Parnoki tanü ashiba agi, January 18 nü lungkak aitba sentong ka agitsü aser January 24 nü MLA 14-i lumia lungkak aittsü.