Mkg D.C Sachin Jaiswal den tepila sentong agi (Pa melena Rajesh Soundararajan IAS arur)

Mokokchung, Aenjeti/Jan. 15 (TYO): Mokokchung Deputy Commissioner, Sachin Jaiswal IAS den tepila sentong ka Aenjeti/January 15 nü yangi D.C Bungalow Mokokchung nung temenungratsüka agiogo.
Tanü iba sentong nung Outgoing Deputy Commissioner, Sachin Jaiswal IAS-i jembidang, pa Mokokchung nung küm asemshi district adminstration mapa balala nung tenzükdang, külem administrator-tem, staff-pur, HoD’s balala, Ao Senden-i anir lokti tentet balalai amalitepa yaritepba ajanga mapa aika nung takok ngua aruogo, anungji, ajak dang pelar, ta ashi.
“Küm asem tashi Mokokchung nung jangratema liogo, ni Mokokchung kodanga mamatoktsü aser Mokokchung nüburtem dang kangasa pelar,” ta ashi. “Mapang tatsüka alidang langka kar nung danga aibelena inyaka lira mesüra nisung kar danga yiruja lira, tatok agütsüdaktsünür,” ta paisa mepishia metetdaktsü.
“Ni Mokokchung toktsür oaka, Mokokchung nüburtem asoshi ni akokba mapa ajak nung yariteptsü mulunga lir,” ta paisa shisem.
Tanü iba sentong nung DPDB tenüng nung Dy. CMO Dr. Kibang, Officers’ Club of Mokokchung tenüng nung CVO Dr. B.M Sunep, Mokokchung D.E.F tenüng nung Mokokchung S.P Raguramarajan IPS, Mokokchung nübur tenüng nung Ao Senden Tir Chubawati, Staff tenüng nung UDA Moainba, Dobashi tenüng nung PA to DC Tuli Noklentoba, Outpost Admin. Officer tenüng nung Mangkolemba ADC Razouvolie Dozo aser D.C office tenüng nung ADC & MMC Administrator W. Manpai Phom parnoki tepila o tatsütsü jembi.
Office aser telok balalai Sachin Jaiswal nem o tajung aika ashiba den senpet balala agüja tushiogo. Pa yangi nungi Kohima-i Work & Housing Department nung Joint Secretary ka ama temaba mendeni atur. Pa ya lanur administrator ka dang süaka, tongtibangsa pa mapang election ana denjia pa lannisüba kübok alima tensa tia kanga junga azüoka takok ngua agitetba asoshi nüburtemi pa dang pelaba lemsatep.
Sachin Jaiswal melena taoba mapang Mokokchung Addl. D.C inyaksang aser tawa Kohima D.C inyaksang Rajesh Soundararajan IAS-i Mokokchung D.C mapa belenzüktsü, ta osang ajanga angazüker.
Iba sentong nung D.C office nung inyakertem den district administrator, department balala nung tokolak pur, Ao Sendeni anir mulungtet telok balala aser osangbenertem densema liasü. Iba sentong nung Mokokchung SDO (C), Thungchanbemo menden liasü aser Mokokchung Town Baptist Arogo, Associate Pastor, Temsüwati-i temoatsü meshia sarasademer sentong tenzük aser paisa tenüngsang agüja sarasademer tembang. Talipokum Pongeneri “may the road rise to meet you” ta sür ken tajung ka tenloktsü.