Assam lisopurtemi Constitution (ST) Order (Amendment) Bill rongdok

Kokrajhar, January 15 (Agencies): Assam nung Amid Bhogali Bihu (Maghw Domashi) benjung amungba mapang Mongulbarnü lisopur telok aikati Meji (bonfire) nung Constitution (Scheduled Tribes) Order (Amendment) Bill, 2019 rongdok.
Assam nung nütsüng teimba aliba aser advanced kin 6 nem Scheduled Tribe (ST) jenjang agütsütsü atema State aser Centre sorkartemi telemtetba agiba anema parnoki iba mapa inyak.
Kokrajhar nung Coordination Committee of the Tribal Organisations of Assam (CCTOA) züngsemtemi Bill anema Constitution (Scheduled Tribes) Order (Amendment) Bill, 2019 rongdok.
Centre aser State sorkartemi Assam nung chichiba lisopurtem samatsütsü atema tasa atonga inyaker, ta ABSU general secretary Lorence Islary-i ashi.
“Registrar General of India (RGI) aser National Commission for Scheduled Tribes-i tiben tashi iba mapa inyaktsü asüngdangba magizük. India Linük Temzüng kübok item kin 6 nem Scheduled Tribes jenjang agütsütsü temsüa mali ta parnoki ashi” ta Lorence Islary-isa metetdaktsü.
Centre aser State sorkartem parnok tajangzük angutsü bushia Assam nung chichiba lisopurtem samatsütsü atema tasa atonga inyaker, ta paisa shisem.
All Assam Tribal Sangha nung taoba tir Ranjit K Borgoyary-ia ashiba agi, “Item kin 6 nem Scheduled Tribe jenjang agütsüra, shisaliok rejutem, sorkar office tem aser political institutions (autonomous councils mesüra state Assemblies) nung Scheduled Tribes atema lemzükja aliba mendentem nung amentsü atema parnoki merangtsü.”
Iba ajanga Assam nung tang aliba Scheduled Tribe kintem samatsütsü kechiyong Linük Temzüng nung kasa nisung telok sasep nung mapa balala meinyaktsü lateta lir, ta Borgoyary-isa shisem.
Kin trok ya other backward classes (OBCs) kübok züngoka lir aser parnok re-notify asütsü atema ozüng lateta mali, ta paisa ashi.