Voter Awareness Forum indang training ka agi

Dimapur, January 15 (TYO): January 15, 2019 nü Hotel Japfü Kohima nung Voter Awareness Forum asoshi State level master trainertemi nodal officers nem training ka agütsü.
Department aser Directorate balala nungi nodal officer tem indang training nung Chief Electoral Officer, Abhijit Sinha, IAS-i o jembidang “democracy ka nung election ya tongtipangtiba mapa ka lir aser iba mapa ya timi inyaktsüla” ta ashi.
Sorkar mesüra nija telok ka nung Voters Awareness Forum (VAF) ka alitsüla aser iba nung Departmental Head menden asütsüla. Iba nung Nodal officer ka aser executive züngsem pungu nungi trok adentsüla, ta Abhijit Sinha-isa metetdaktsü.
Taküm general election agitsü lir anungji asenoki nübortem dang electoral rolls nung tenüng bushitsü aser jangjashitsü atema osang prokshitsüla. Tang yanglua aliba electoral roll nung tenüng melira, vote magütsütettsü ta paisa shisem.
Iba campaign dang “Voters Verification and Information Programme” (VVIP) ta ajar aser iba asoshi Voter Awareness Forum atema Photo Electoral Roll (PER) nung tenüng jangjaba kanga tongtipang mapa ka asütsü, ta Nagaland Chief Electoral Officer-isa ashi.
Paisa, vote agütsürtem dang National Voters Services Portal, (www.nsvp.in) nung tenüng jangjatsü aser Toll Free 1950 ajanga osangtem metetpelatsü atema metetdaktsü.
Sentong nung Additional Chief Electoral Officer, N. Moa Aier aser Deputy CEO, Vekho Vero nati VAF indang Calendar of activities, Voter Verification aser tanga onüktem jembi.
Tanü sentong nung master trainer temji- Associate professor, Kohima College Keneilesa aser Research Associate SCERT Wozhamo liasü aser Programmer Kitoka-i Registration aser Name Check indang power point presentation ka sayu.